نێچیرڤان بارزانی: سوفی دوو جار تووش کۆڕۆنا هات و ژیان کەمیگ کرد و پێشکەش فرەیگ کرد
شەفەق نیوز/ نێچیرڤان بارزانی سەرۆک هەرێم کوردستان، ئمڕوو شەممە، باس خاسی رەحمەتی فرسەت سوفی پارێزگار هەولێر کرد، و وت: ژیانی لە پێشکەشکردن وەردەوامیگ بوی.
بارزانی لە وتارەگەی لە رسوومەیل پێشوازیکردن لە تەرمەگەی سوفی و ماڵئاوایی کردنی وت: ئمڕوو وەدڵ پڕ خەفەتیگ، پێشوازی لە تەرم دکتۆر فرسەت کەیمن، و رەحمەتی ژیان کەمیگ کرد بەڵکم پێشکەش فرەیگ کرد، و نموونەی دەسپاکی و ئاشکرایی بوی، و وەکارە خاسەگانی بویە خوەشەویست گشتی.
وتیش؛ سەرۆک مەسعود بارزانی دوێەکە وت؛ ک یەکیگ لە کوڕەگانی لە دەس بردگە، و ئاماژە کرد ک فرە لەو دوبلۆماسیەیلە ک هانە هەرێم باس لە خاسی رەحمەتی کردن.
سەرۆک بارزانی هەمیش وت؛ لە سەردەم شۆڕش ئەیلوول خیزانەگەی سوفی لە سای شۆڕشەگە لە ئاوای مەزنە لە چۆمان بوین و فرە ئەرا پێشمەرگە پێشکەش کردن.
وتیش؛ لە جددی کارکردنی رووژ لە دویای رووژ بڕوایی ودڵنیای گشتی وەرگرد، وهەنای ئەرا پەرلەمان کاندید کریا، بەرزترین دەنگ وەرگرد، و هەنای بویە پەرلەمانتار توانای خوەی لە پەرلەمان چەسپان.
سەرۆک هەرێم وتیش؛ سوفی هەمیشە تەقەلا دیاد چاکسازیەگە لە هەرێم فراوانەو بوود، ئەوە ک هیشتەی لەلای گشتی خوەشەویست بوود، و باس لە خەفەت خوەی کرد ک ماوەی کارکردنی جوور پارێزگار هەولێر فرە کەم بوی، وەنە خەڵک هەولێر و دانیشتوەیل هەرێم ئەنجامەیلیگ لە هەولێر فرەتر لەلی دیان.
بارزاني ئاشکرا کرد ک دکتۆر فرسەت سوفی یەک جار تووش کۆڕۆنا وەشیوەی سووکیگ هات، بەڵکم ئەرا دوویەم جارەگە تووشهاتنەگەی سەخت بوی تا ژیانی لەدەسدا.
هەمیش باس لە سوپاس خوەی ئەرا موستەفا کازمی سەرۆک وەزیران کرد ئەرا رەوانەکردن قاسم ئەعرەجی راوێژكار ئەمن نیشتمانی لە جیای خوەی ئەرا بەشداربوین لە رسوومەیل ماڵئاواییەگە.
