موحسن مەندەلاوی داوای لاوردن جیماگەیل نەرێنی لەبان کوردەیل فەیلی کەێد
مەندەلاوی لە وتاریگ لەناو کۆنگرەی زانستی ناودەوڵەتی ئەرا جینۆساید گەل کوردستان (جینۆسایدکردن کورد فەیلی) و ئاژانس شەفەق نیوز چەودیاریی کرد وت: پیرووزبایی لە سازیان ئی کۆنگرە کەیمن، و سوپاس لە گشت بەشداربویەیلی کەیمن، ک بەڵگەکردن و نەفرەتکردن قیزەونترین تاوانەیل بان کورد و کوردەیل فەیلی لە تاوانەیل جینۆسایدکردن کەێدە ئامانج، وەو جویرەگ دادگای نەهیشتن تاوانەیل عراق لە ساڵ ٢٠١٠ بڕیاری دا.
وتیش: هەر لە ویژدان مرۆیایەتی، لە دەوڵەتەیل جەهان و ریخریاگەیل کۆمەڵگای شارستانی و ماف مرۆڤ داوای جیوەجیکردن بەڵگەنامەی ماف مرۆڤ کەم ک لاپەڕەی میژوو خوەنستن و ژیان و نەهامەتی کورد فەیلی هاناویان، و ئەوەگ وەسەریان هات لە بارکردن زوورکاری وەرەو دەیشت سنوورەگە، و بارکردن لەناو وڵاتەگە، و دەسناین وەبان پویل و دارایی و ماڵ و موڵکیان، و ئاڵشتکردن دیموگرافی لە ناوچەیلیان، و زەفتکردن زەویەیلیان، و سەنین رەگەزنامەی عراقی لەلیان، و دەسوەسەرکردن و شکەنجەدان فرەیگ لەلیان لەناو زیندانەیل و ژیرخانەیل بەعس تاوانکار، و جیوەجیکردن ناشریترین تاوانەیل ستەمکاری ک تیوڵ مرۆیی لەلی تەڕ بوود.
وتیش: ئی تاوانەیلە لە نووڕین یاسای ناودەوڵەتی و مرۆیی، تاوان جینۆسایدە وە گشت پەیمانەیل، و جیوەجیکردنی پیشیلکردن زاقیگ بوی ئەرا بنەمایل ماف مرۆڤ.
مەندەلاوی وتیش: خانم و بەڕیزەیل، مسۆگەرکردن مافەیل ئەرا گشت کەمینەیل لە نوێنەرایەتی و بەشداریکردن لە دروسکردن بڕیار و داناین یاسا ک گلەوداین مافەیل زەفتکریاگ گشت پیکاتەیل مسۆگەر کەێد، کەفنە گرنگەیل ئی یاسایلە، و لەی نووڕینە داوا لە حکومەت عراقی کەم بڕیار شمارە ٤٢٦ ئەرا ساڵ ٢٠١٠ گورجەو بکەێد، ک پەیمان سەرۆکایەتی ئەنجومەن وەزیرەیل هاناوی وە لاوردن گشت جیماگەیل نەرێنی لە ئەنجام بڕیارەیل رژیم لەناودریاگ وە ماف کوردەیل فەیلی جویر سڕین رەگەزنامەی عراقییان و زەفتکردن گشت دارایی و ماڵدارییان.
لە کۆتایی وت: ئەی خانم و بەڕێزەیل، داوا لە دەسەی ئامادەکردن ئی کۆنگرە کەم، وە تەمە و بڕیارەیلیگ دەرچوود، و ئەڵگەردانی بکەێد ئەرا راسییگ لەبان زەوی، ئەرا مسۆگەرکردن ماف کورد و کوردەیل فەیلی.
