کۆمسیۆن سەختیەیلیگ دەسنشان کەێد لە جیوەجیکردن هەڵوژاردن کوردستان لە مەوقەی خوەی
داود سەلمان وەڕیەوبەر ریکارەیل و ڕاهێنان لە کۆمسیۆن هەڵوژاردن ئەرا ئاژانس شەفەق نیوز وت: ئەو خشتەی وەختە ک دیاری کریا ئەرا جیوەجیکردنی و چگن وە ئامادەکاری ئەرا جیوەجیکردن هەڵوژاردن لە مەوقەی دیاریکریاگ خوەی لە ١٨ی کانوون یەکەم ئەرا هەڵوژاردن ئەنجومەن پارێزگایل عراق گریە وە هەڵوژاردن هەرێم کوردستان نەوسایە.
وتیش؛ هەڵوژاردن پەرلەمان هەرێم کوردستان زوور فرە سەختیگ دروس کەێد، چوینکە خشتەی مەوقەی ئی هەڵوژاردنە بەش نیەکەێد.
ئەو وەرپرسە لە کۆمسیۆن وتیش: ئەو وەختە ک تا جیوەجیکردن هەڵوژاردن مەنیە، زووریگ هاوردیەسە مل کۆمیسیۆن، چوینکە پاڵپشتیکردن لۆجستی و رەوش هونەری فرە سەختە ئەرا جیوەجیکردن هەڵوژاردن پەرلەمان کوردستان لەی ماوە، لەلیان میکانزم وەرگردن ئەنجامەیل، و دیاری کرد ک هەڵوژاردن پەرلەمان هەرێم کوردستان ئەلیکترۆنیە، و هەڵوژاردن ئەنجومەن پارێزگایل هەمیش ئەلیکترۆنیە، و لەیەکدان کەفێدە وەرگردن ئەنجام دوو هەڵوژاردنەگە لەبان یەک سێرڤەر تا مەوقەی دیاریکریاگ خوەی جیوەجی بکریەێد.
لە ١٥ی حوزەیران ٢٠٢٣، نێچیروان بارزانی سەرۆک هەرێم کوردستان وەگەرد شاند کۆمسیۆن باڵای سەروەخوەی هەڵوژاردن لە عراق وە ئامادەبوین جنین بلاسخارت نوینەر نەتەوەیی، باس ئامادەیی سەرۆکایەتی هەرێم کوردستان و حکومەت و گشت لایەنەیل پەیوەنیدار ئەرا سەرکەفتن وە هەڵوژاردن کرد.
لە کۆتایی مانگ ئادار گوزەشت، نێچیروان بارزانی سەرۆک هەرێم کوردستان، فەرمانیگ هەرێمی دەرکرد، لەناوی رووژ ١٨ی تەشرین دویەم ئایندە دیاری کرد ئەرا جیوەجیکردن هەڵوژاردن پەرلەمان لە هەرێم کوردستان.
