مردن سێ کەس وە گورزیگ ئاسمانی نوو وەبان ماشینیگ لە باکوور سلێمانی
2024-09-05T14:22:59+00:00
شەفەق نیوز/ سەرچەوەیگ ناوخوەیی، ئمڕوو پەنجشەممە، خەوەردا درۆنەیل لە پەلاماردانیگ ئاسمانی ماشینیگ لەناوچەی "چوارتا" لە باکوور پارێزگای سلێمانی کردنە ئامانج.
سەرچەوەگە وە ئاژانس شەفەق نیوز وت، لە ئەنجام پەلامارداینەگە سێ کەس کوشیان کە سەرنشین ناو ماشینەگە بوین، وەبی ئەوەی زانیاری زیاتر بوود.
عوسمان ئەنوەر قائیمقام قەزاگە وە ئاژانس شەفەق نیوز وت، درۆنەیلە نیمەڕوی ئمڕوو ماشینیگ لە جویر "پیک ئاب" خاوەن تابلۆی سلێمانی کردنەسە ئامانج کە یەکیگیان خەڵک ئاوای "جمکە"س و یەکیگتریش خەڵک ئاوایگ تر سەر وە قەزاگەس، کۆتا کەسیش مناڵیگە شیوەی دیارنییە لەوەر هیزگردن ئاگر ، دیاریکرد قوربانیەیل هاوڵاتی مەدەنین.
وتیش: رویداوەگە نزیکەی ساعەت 1:40 نیمەڕوی ئمڕوو رویدایە، تەرمەیل ئەرا پزیشک دادوەری کلکریانە و سەرچەوەی درۆنەگە نەزانریاس.
