ماموسایەیل ناڕازی هەڕشەی "زەنگ بایکۆت" و بەسین دەر مەکتەوەیل دەن

شەفەق نیوز/ وەگەرد نزیکەوبوین ساڵ نووی خوەنین لە کوردستان، ماموسایەیل ناڕازی لە سلێمانی، هووشداری تونیگ وە حکومەت هەرێم دەن، دیاریکردن ئامادەکاریکەن ئەرا بەسانن دەرەیل مەکتەو هەنای مووچەی مانگ ئاب و ئەیلوول خەرج نەکرێد، دووپاتکردن "لەجیای زەنگ خوەنین، زەنگ بایکۆت کوتن".

ماموسا دڵشاد میرانی، ئەندام لیژنەی ماموسایەیل ناڕازی  وە پەیامنێر ئاژانس شەفەق نیوز وت "قەیرانەیل وەرەو فرەچگن چن لەوەر پشتگووش خستن حکومەت ئەرا داواکاری مامووسایەیل، و ئیمە وەردەوامین لە جموجویلەیل ئەرا وەدەسهاوردن مافەیلمان، نیەوسیمن تا وە تەواوی سەرکەفیمن".

ئاشکرایکرد "ناڕەزاییەل نوێنەرایەتی هەزاران مامووسا کەێد کە هەس وە ستەم کەن".

دووپاتکرد "ماموسایەیل ناڕازی لەوباوەڕەن حکومەت پابەند نەبوی وە پەیمانەگانی وەرینی، دیاریکرد رووژ 25 ئەیلوول سەرەتای بایکۆت فەرمیە لە پرۆسەی خوەنین ئەگەر حکومەت گامەیل دیاریگ ئەرا قەیرانەگە نەنەد".

لەلایگیش وەزیر پەروەردە دکتۆر ئالان حەمە سەعید دووپاتکرد، هویچ استەنگیگ لەنوای دەسوەپیکردن ساڵ نوو خوەنین لە وەخت خوەی  نییە، وتیش "زەنگ ساڵ خوەنین نوولە 25 ئێ مانگە درێد لەلی، کە یەکەم رووژ ساڵ خوەنین  2024-2025س".