ئیمارات جویلە کەێد وەرەو بەرهەمهاوردن لە ناوچەیگ گەشتوگوزاری لە هەرێم کوردستان
شەفەق نیوز/ ئەحمەد زاهری قونسڵ گشتی ئیمارات لە هەولێر، سەردان ناوچەی سۆران سەروەخوەی کرد، و وەگەرد وەرپرسەیل ناوچەگە گردەو بوێ، تا لە نزیکەو بنووڕێدە توانای بەرهەمهاوردن لە کەرت گەشتوگوزاری لەی ناوچە ک بڕیگ لە شوین و سەیرانگایل سرووشت رەنگین هاناوی.
هەڵگورد نەجیب سەرپەرشتیار ئیدارەی ناوچەگە لە کۆنگرەیگ رووژنامەوانی هاوبەش وەگەرد قونسڵەگە وت: سۆران ناوچەیگ گەشتیاری فراوانیگە، و دیاری کرد ک یە یەکەم سەردانە لەلایەن قونسڵەگە ئەرا ناوچەگە، ک لەناوی باس ئامانجەیل دامەزرانن ئیدارەی سەروەخوەی لە سۆران.
هەمیش وت: وەئامادەبوین وەرپرسەیل ناوچەگە، گفتوگۆ فراوانیگ وەگەرد قونسڵەگە کردیمن لەباوەت پڕۆژە وپروگرامەیل ناوچەی سۆران، و دووپات کرد ک ئیدارەی سۆران وحکومەت هەرێم کوردستان تەقەلای گرنگیداین زیاتر وە کەرت گەشتوگوزاری لە سۆران دەن، و پیشکەشکردن گشت ئاسانکارییگ ئەرا بەرهەمهاورەیل ک خوازن کار لەی کەرتە بکەن، تایبەت دەوڵەت ئیمارات ک بەرنامەی گەورەیگ لەی چینە دیرێد.
لەلای خوەییش، قونسڵ ئیمارات لە کۆنگرەگە وت: ئمڕوو کارمان پەیاکردن شیوەی لەیەکڕەسینەوەس وەگەرد سەرپەرشتیار ناوچەی سۆران ئەرا داناین پلانیگ بەرهەمهاوردن، تا بتوەنیمن وەیەکەو لە ئایندە کار بکەیمن، وتیش: ئیمارەت گرنگی وە بەرهەمهاوردن لە هەرێم کوردستان دەێد.
