ماکرۆن ئەرا نێچیروان بارزانی دووپات لە وەردەوامی پشتگیریکردن فەرەنسا ئەرا عراق و قەوارەی دەستووری کوردستان کەێد
شەفەق نیوز/ نێچیروان بارزانی سەرۆک هەرێم کوردستان، دویەشەو پەنجشەممە، پەیوەندی تەلەفۆنی لە ئیمانۆئێل ماکرۆن سەرۆک فەرەنسا وەرگرد، لەناوی باس نووڕین لە پەیوەندییەیل ناوەین هەولێر و بەغدا کریا، و رەوش ناو عراق و هەرێم کوردستان، و گەشەیل لە سوریا و خوەرهەڵات ناوڕاس.
سەرۆکایەتی هەرێم کوردستان، لە بەیاننامەیگ شەوەکی ئمڕوو جمعە وت: هەردوگیان دووپات لە گرنگی خەسەوکردن تەقەلایل کردن ئەرا مقیەتیکردن ئاشتی و ئارامی ناوچەگە، و وەردەوامی گفتوگۆ وەرد حکومەت فیدڕاڵی عراق، ئەرا چارەسەرکردن ناکۆکیەیل ناوەین هەولێر و بەغدا ئەرا ئەو گرنگیە کە ئەرا ئارامی عراق دیرێدەی.
هەرلیوا، سەرۆک نێچیروان بارزانی سوپاس هەرێم کوردستان ئەرا پشتگیریکردن و رۆڵ برادەری فەرەنسا و سەرۆک ماکرۆن رەسان لە دەسمیەتیدان عراق و هەرێم کوردستان وەتایبەت لە وەختە سەختەیل، وتیش: گەل کورد قەت ئەو پاڵپشتیکردن فەڕەنسا لە هویری نیەچوود.
لەلای خوەییش، سەرۆک ماکرۆن دووپات لە وەردەوامی پشتگیریکردن فەرەنسا ئەرا عراق و قەوارەی دەستووری هەرێم کوردستان کرد، و دووپات کرد کە فەرەنسا گرنگی گەورە دەێدە پەیوەندییەیلی وەرد هەرێم کوردستان، و ئافەرین لە تەقەلایل سەرۆک نێچیروان بارزانی ئەرا ئارامی و چارەسەرکردن ناکۆکیەیل کرد.
هەر لەو پەیوەندیی تەلەفۆنیە، ماکرۆن پیرووزبایی لە نێچیروان بارزانی کرد وە سەرکەفتن هەڵوژاردن پەرلەمان لە هەرێم کوردستان، و رووشنایی خستە بان تەقەلایل دروسکردن حکومەت نوو، و هەردوگ لایەن هاوڕا بوین لەبان گرنگی مقیەتیکردن پیکاتەیل لە عراق و سوریا.
هەردوکیان دووپاتیش کردن لەبان مقیەتیکردن مافەیل کورد لە سوریا، و باس بڕیگ باوەت خاوەن گرنگی هاوبەش کردن، وەگورەی بەیاننامەی سەرۆکایەتی هەرێم.
