مەسرور بارزانی: کوردستان تویش زیاتر لە هەزار پەلامار هاتیە و پشتگیری سنوردارکردن چەک کەیمن
شەفەق نیوز ـ هەولێر
سەرۆک حکوومەت هەرێم کوردستان، مەسرور بارزانی، ئمڕوو شەممە، دووپات کرد لەبان پشتگیری حکومەتەکەی ئەرا حکومەت عراقی لە هەڵمەت سنووردارکردن چەک وە دەس دەوڵەت.
بارزانی لە دیداریگ وەرد ماڵپەڕ "ئەلجەزیرە"، کە ئاژانس شەفەق نیوز وەدویاچگنی کردیە وت: "هەرێم کوردستان تویش زیاتر لە هەزار پەلامار وە مووشەک و فرۆکەی بیفرۆکەوان (درۆن) هاتگە".
دیاریکرد، پەلامارەیل وەبان هەرێم وە ڕاستەوخۆ لە ئیران یا لەناو عراق وەدەس بڕیگ لە میلیشیایەیل بویە، ئاشکراکرد "ماوەی دە ساڵە هویچ سەربازیگ ئەمریکی لە بنکەی ئاسمانی هەریر نییە".
بارزانی درویژە دا وە قسەیلی و وت: "هویچ لایەنیگ گوشار وەبانمان نەنایە ئەرا چگنە ناو جەنگ، و نیەخوازیمن ببویمنە لایەنیگ لە هەر جەنگیگ لە ناوچەگە"، دیاریکرد "گشت ئەوەگ خوازیمن پاڕێزگاریکردنە لە هەرێم کوردستان و هیشتنی دویر لە هەر وەردەوەردە".
لەبان دەنگوباسەیل بەسیاگ وە پەیوەنی وەرد ئیسرائیل، بارزانی ئاشکرایکرد: "پەیوەنی وەرد ئیسرائیل نەیریمن، و سیاست دەیشت لە تایبەتمەنی حکومەت فیدراڵییە".
لەبان پەیوەنی وەرد وڵاتەیل هاوسا، بارزانی دووپات کرد: "پەیوەنی خاسیگ وەرد دیمەشق هەس کە لە ئەوزەڵکردنە، و پەیوەندییەیل وەرد تورکیا فرە خاسە و هاوکاریکردن وەخوەی دوینێد".
دیاریکرد، حکومەت عراقی مۆڵەت دایە وە گرووپە چەکدارەیل تا 30 لە مانگ ئەیلول/ سپتەمبەر ئایندە، ئەرا رادەسکردن چەکەیلیان وە دەوڵەت، وە هووشداریدان لەوەگ هەر چالاکییگ چەکداری دویای کۆتایی هاتن مووڵەت حکوومەت، وەپای یاسایەیل مامەلە وەردی کرێد، لەوانەیش یاسای نواگیریکردن تیرۆر.
لە وەختیگ هەرێم کوردستان تویش پەلامار مووشەکی و فرۆکەی بیفرۆکەوان (درۆن) فرەیگ هاتیە لە سەرەتای جەنگ ئەمریکا و ئیران، لە هەمان وەخت ئیران و بڕیگ لە گرووپە چەکدارەیل عراقی وەرپرسایەتی ئەو پەلامارەیلە گردنە مل وە دەسپیچگ ئامانجکردن بەرژەوەندییەیل ئەمریکا لە کوردستان و پێگەی ئۆپۆزسیۆن ئیرانی وەسفی کەن.
