مەسرور بارزانی: بایەدە هێزە چەکدارە نا یاساییەگان لە کوردستان دەرچن
شەفەق نیوز/ مەسرور بارزانی سەرۆک حکومەت هەرێم کوردستان، رووژ دووشەممە، جەختکرد لە گرنگی وەردەوامی پشتگیریکردن هاوپەیمان ناودەوڵەتی ئەرا هێزەیل پێشمەرگە ئەرا وەردەوامکردن جەنگەگە دژوە داعش، وهەمیش بانگواز ئەرا گرنگی جیوەجیکردن رێککەفتنەگەی شەنگال و چووڵکردن ناوچەگە لە سیما چەکداریەیل نا یاساییەگان کرد.
نووسینگەی راگەیانن حکومەت کوردستان لە بەیاننامەیگ رەسیە ئاژانس شەفەق نیوز وت؛ بارزانی پێشوازی لە کیون ویل بوربیر فەرماندەی هێزەیل ئۆپراسیۆنەیل تایبەت هاوپەیمان ناودەوڵەتی لە عراق و سوریا کرد و هەمیش رزی ووڵەر قونسڵ ئەمریکا لەلای هەولێر، ئەرا باسکردن لە رەوشەگەی عراق وناوچەگە و گرنگی هەماهەنگی لەناوبەین هێزەیل پێشمەرگە و هاوپەیمان ناودەوڵەتی.
.وتیش؛ هەمیش جەختکریا لە وەردەوامبوین پشتگیریکردن هێزەیل پێشمەرگە ئەرا نواگردن هەڕەشەیل داعش.
بارزاني ئەرزشدار پشتگیری هاوپەیمان ناودەوڵەتی ئەرا هەرێم کوردستان کرد لە نواگردن تیرۆر، و جەختکرد لە گرنگی دەرچگن هێزە چەکدارە نا یاساییەگان لە هەرێم کوردستان تا هەرێم بتوێتێد گشت رەنجەیلی و هێزەیلی وگشت تواناگەی بخەێدە دژایەتی تیرۆر.
سەرۆک حکومەت هەرێم دووپاتکرد لە گرنگی جیوەجیکردن رێککەفتنەگەی شەنگال و دەرچگن میلیشیا چەکدارەگان لە ناوچەگە، ئەرا هاوردنەوەی ئاسایش و ئارامی ئەرا ناوچەگە، و دابینکردن ژینگەی گونجیاگیگ ئەرا چگنەوەی ئاوارەگان وەرەو ماڵەیلیان.
لەلای خوەییش فەرماندەی هێزەیل ئۆپراسیۆنە تایبەتەگان لە هاوپەیمان ناودەوڵەتی دووپاتکرد ک هەرێم کوردستان هاوبەش گرنگیگە ئەرا ئەمریکا و هاوپەیمان ناودەوڵەتی لە ناوچەگە.
