مۆسیقای جادە.. کەمان ژەنیگ خوەشی خەێدە سلێمانی (وێنە)
شەفەق نیوز/ نووترین تۆێژینەوە زانستیەگان ئووشن ک گووشگردن لە مۆسیقا دڵ خوەشەو کەێد، و بوودە هاوکار ئەرا رێکخستن هەستەگان، و ئارامی.
ک مۆسیقا دەروین و تەندروسی ئایەم خاسەو کەێد، و هیلێد مەغزی گورج و ئامادە بوود، و هەمیش هوریمانی گورجەو کەێد، و تۆێژینەوەگان دین ک تەنیا ٥٠ خولەک لە گووشگردن مۆسیقا ئاست لەشە وەرگریەگان ک دژایەتی بیماریەیل فرەیگ کەن لەناو لەش ئایەم بەرزەو کەێد.
لە شار سلێمانی لە هەرێم کوردستان، مۆسیقا ژەنیگ هەس وەناو (حامد ژەنیار) گشت رووژیگ یەکشەممە لە هەفتەگە لەناوڕاس مەیدان سەرای لە شار سلێمانی لەبان کەمانەگەی ژەنێد، ک مەردم فرەیگ لەدەوری گردەو بوون و گووش دەنە ئاوازە دڵگیرەگانی.
حامد ژەنیار ئەرا ئاژانس شەفەق نیوز ئووشێد: هەر لە مناڵیەو خوەشم لە مۆسیقا تیەێد، و فێرخواز مۆسیقار گەورا موجتەبا میرزادە بویم ک لە کوردستان ئیران وەناوبانگە، و ئامانجم یەسە ک مەردم وە گرنگی مۆسیقای جادە زیاتر بڕەسنەو، و دیاری کرد ک ئەیە هونەریگە لە هونەرە جهانیەگان.
و ئاماژە کەێد ک سلێمانی پایتەخت رووشنهویری و هونەرەگانە، و مەردمەگە لەیلا وەگرانی مۆسیقا زانن و زانن چەنیگ لەناو ژیان مەدرم گرنگە، و ئاماژە کرد ک خوەی خەنەگان لە دەمچەو خەڵکەکە دوینێد هەنای گووش لە مۆسیقاگەی دەن، و گرتەیلیگ یادانە وەگەردی گرن، و پێروزبایی و هاندان ئەرا کارەگەم پێشکەش کەن.
ژەنیار هەمیش ئووشێد: تەمای من ئەوەسە ک کەلتوور مۆسیقای جادە بڵاو بکەم و گرنگییگ فرەتر وەپی بیەم، و داوا لە وەڕێۆبەرایەتی گشتی هونەرە جوانەگان کرد پشتگیریی بکەن تا لەی کارە وەردەوام بوود.
جی باسە ک حامد ژەنیار دەرچگ پەیمانگای هونەرە جوانەگانە و ماموستاس لە یەکیگ لە مەکتەوەیل بنەڕەتی لە شار سلێمانی.
