میدیایل راگەیانن ئیرانی: باس خاسی سەردان نێچیروان بارزانی ئەرا تەهران کەن
راپۆرتیگ ئاژانس میهر باس رۆڵ سەرۆک هەرێم کردگە، و چیرووکیگ میژوویی بنەماڵەگەی و خەباتی تا رەسێدە ژیانی لە ئیران و شارەزایی لە زوان فارسی و دووپاتکردن لەبان دیالۆگ و لەیەکفامستن ئەرا چارەسەرکردن پیشکەش کردیە.
هەمیش باس هەڵاوسان پەیوەندییەیل ناوەین ئیران و هەرێم کوردستان کرد لە قۆناغە جیاجیایل، کە دیارترینیان گرژیی ئەمنی و بویین گرووپە کوردییەیل دژوە تەهران لە خاک هەرێم کە وت: “ئەوە مەزەنە کریەێد وەگەرد سەردانەگەی نێچیروان بارزانی ئەرا تەهران ئاست کارلێکی سیاسی ناوەین هەردوگلا زیاتر بوود”.
ئاژانس میهر باس ئەگەر پەرەپیدان پەیوەندییە ئابوورییەیل وەرد ئەو سەردانە کرد کە وە وتەی خوەی سوودی ئەرا هەردوگ گەل تیەێد.
لەلای خوەییش رووژنامەی هەفت سوبح لە راپۆرتیگ وت: سەردانەگەی نێچیروان بارزانی دویای نزیکەی سێ ساڵ لە بانوخوارکردن پەیوەندییەگە تیەێد، وتیش: سەرۆک هەرێم کوردستان کەسیگ خاوەن پەیوەندییگ خاسە وەرد تەهران.
لە راپۆرتەگە باس لەوە کەێد کە ئیسە نێچیروان بارزانی دەستپێشخەری کەێد ئەرا دامەزرانن ئاشتەوایی و فراوانکردن پەیوەندییەیلی وەرد ئیران.
وەرجەیە، نێچیروان بارزانی سەرۆک هەرێم کوردستان لە سەردانیگ فەرمی ئەرا تەهران وەرد ئیبراهیم رەئیسی سەرۆک کۆمار ئیسلامی ئیران گردەو بوی، بیجگە لە ئەمیر حسێن عەبدوڵڵاهیان وەزیر دەرەوەی ئیرانیش و وەرد عەلی خامنەئی ریبەر ئیران .
لە دیدارەگە وەرد رەئیسی، کە دوو جیگر سەرۆک و وەزیر ناوخۆ و شاندیگ سەرۆکایەتی هەرێم کوردستان ئامادەی بوین، هەردوگلا دووپات لە پتەوکردن پەیوەندییەیل ناوەین ئیران و عراق و هەرێم کوردستان لە بنەمای خاس هاوسایەتی کردن و بەرژەوەنی هاوبەش، و بەرزکردن ئاست گواستنەوەی بازرگانی و پەیوەندییە ئابوورییەیل، و دەسخوەشیکردن لە پەیوەندییە دویرودرویژ و میژووی ناوەین کۆمار ئیسلامی ئیران و هەرێم کوردستان.
