کۆمپانیای داناغاز دووارە ئەرا کار بەرهەم کێڵگەی غاز کۆرمۆر لە سلێمانی گلەو خوەێد
دەسکردن وە بەرهەمهاوردن دویای 5 رووژ لە وسیانی تیەێد، وە بڕیار کۆمپانیاگە لە ئەنجام بمبارانکردن کێڵگەی کۆرمۆر لەلایەن فڕۆکەیگ بێفڕۆکەوان کە بویە مدوو کوشیان 4 کرێکار بیانی.
کۆمپانیاگە ئمڕوو چوارشەممە لە بەیاننامەیگ دووپات کرد کە "گام ئەرا دووارە وەکارکەفتن لە بەرهەمکردن لە کێڵگەی گەپ غاز کوردستان نەێد".
وتیش: "دەسەوکاربوین لە کێڵگەی کۆرمۆر دویای ئەو ریکارەیل وەرچەوە تیەێد کە حکومەت عراق و حکومەت هەرێم کوردستان ئەرا قایمکردن ڕیشەیی وەرگرییەیل لە شوین کارەگە وەجی هاوردن".
لە بەیاننامەگە دووپات کرد کە"کۆمپانیای ئیماراتی و هاوبەشەیلی گامەیل خوازیاگ ئەرا دەسەوکاربوین لە بەرهەمهاوردن جیوەجی کرد و یەیش وەگەرد جیوەجیکردن ریکارەیل نوویگ ئەرا فرەترین بیوەیی گشت کرێکارەیل و دامەزراوەیل".
کۆمپانیای داناغاز، رووژ جمعە ٢٦ نیسان ٢٠٢٤ راگەیان کە یەکیگ لە تانکیەیل هەڵگردن شلە لە ناو دامەزراوەیل کێڵگەی کۆرمۆر لە هەرێم کوردستان عراق، لەلایەن فڕۆکەیگ بێفڕۆکەوان کریاسە ئامانج، یەیش بوبە مدوو وسیان وەختانە لە کارەیلی.
پەلامار فڕۆکەی بێفڕۆکەوان وەبان یەکیگ لە گەورەترین کێڵگە گازییەیل عراق بویە مدوو وسیان وەختانەی بەرهەمکردن کارەبا، یەیش بویە مدوو بڕیام کارەبای گەورە لە سەرتاسەر هەرێم کوردستان.
پەلامارەگە وەبان کێڵگەگە بویە مدوو کوشیان 4 کارمەن بیگانە کە لە شوینەگە کار کەن، وەگەرد زەخمداری 8 کەسی ترەک.
