«لق پەنج» ساڵیاد جینۆسایدکردن کوردە فەیلیەکان کەێد
شەفەق نیوز/ لق پەنج - پارت دیموکرات کوردستان لە بەغداد، ساڵیاد تاوان جینۆسایدکردن کوردە فەیلیەکان وەدەس رژێم بەعس لە عراق کرد.
لقەگە لە بەیاننامەیگ وت: وەرجە ٤١ ساڵ و لە سەرەتای مانگ نیسان لە ساڵ ١٩٨٠، رژێم بەعس لەناوبریاگ تاوان سەردەمەگە وە دەسوەسەرکردن هەزاران لە خیزانەیل کورد فەیلی لە بەغداد پایتەخت و پارێزگایل ناوڕاس و باشوور وڵاتەگە کرد وەدەسپیچگ لایەنی ئیرانی، باوجی ئیمە دووپات کەیمن ک هووکار سەرەکی ئەو تاوانە خوەی لەوەر لایەنی نەتەوەییان بوی و دەور ناوداریان لە بزووتنەوەی خەبات نەتەوەیی کوردستانی بوی.
وتیش؛ هەنای ئەو رووژویل سەختە خەیمنە یاد، سەدان لە دیمەنە زیاندارەیل تێەنە هویرمان ک تیوڵ مرۆیی لەشەرم دڕندەیی ئەو تاوان نا رەوشتییە تەڕ بوود ک وە کردەوەی بارکردن زوورکاری و بیسەروشوونکردن ٢٠ هەزار گەنج کورد فەیلی، و تاڵانکردن دار وماڵداریان لەلایەن چەتەیل بەعس شوونبڕیاگ و جیاکردن خیزانەیل لەناون زیندانە نامرۆییەکان و رەوانەکردن بڕەیل گەورایگ لەلیان وەرەو سنوور ئیران لەناو کوێە و دووڵ وبیاوانەیل.
بەیاننامەگە وتیش: خەڵک چین کوردە فەیلیەکان هەرچەن ئەو کارەسات زیاندارە وەخوەیان دین، دەسپاچە نەوسیان وخوەیان وەدەس رەوشەیل نەیان، ک وەزوی زەخمەیل خوەیان تیمار کردن و نوای تاوانەگە وەتوانا و خوازین وەهێزیگ گردن، ک بڕەیل لەلیان روی وەرەو مەیدانەبل کار کردن، ک لەلیان چەک وەگەرد هێزەیل پێشمەرگە و ئەو هێزە سیاسییەکان هەڵگرد، ئەرا وەردەوامی خەباتەگە دژوە رژێم سەدامی.
لق پەنج وتیش؛ ئی باوەڕە دیریمن ک رژێم لەناوبریاگ پلان ئەرا زنجیرەی تاوانەیلیگ جینۆسایدکردن دژوە گەل کوردمان لە وەخت رەسینی ئەرا حکومڕانی دانا، و وە دەسوەشانن و ئەنفالکردن یەکەم سەنگەریان بوی و وە ئەنفالکردن بارزانییەکان و وەکارهاوردن چەک بایوڵۆجی لە هەڵەبجە وناوچەیلیگ لە پارێزگای هەولێر و دهۆك تا رەسیە ئەنفال گەرمیان و ئەو شار و ئاوایەیل کوردستان وە کوشتن زیاتر لە ١٨٠ هەزار هاووڵاتی کورد مەدەنی لە ژن و مناڵ و پیر.
وتیش: ئیمە لەی وەختە ک ساڵیاد تاوان بارکردن و بیسەروشوونکردن کورد فەیلی کەیمن، وەگشت رێزیگ ئەرا گیان پاک شوهیدەیل وسیەیمن، وداوا لە حکومەت هەرێم و حکومەت فیدڕاڵی کەیمن تەقەلا زیاتر بیەن و مینەی تەرمەیل بیسەروشوونەیل بکەن تا کۆتایی وە چەوەڕیکردن درێژ خیزانەیل قوربانییەکان باێد ک تا ٤١ ساڵ کیشا، و هەمیش داوا لە گشت حزبە کوردستانیەکان و هێزە نیشتمانیە عراقیەکان و حکومەت هەرێم و فیدڕالی کەیمن مافەیل ئی چین قوربانیکارە وەگورەی دەستوور و یاسا ئەرایان بارنەو.
