لەبان گرانی و کەم پۊلی.. ژنەیل کوردستان واز لە سیمایل نەوروز ناوردنە.. وینە
شەفەق نیوز/ وەرجە ئاهەنگ جەژنەیل نەوروز، هەمیشە مردمەگە دەسکەنە جۊلەی لەناو بازاڕەیل شار سلێمانی ک خەڵکەگە خوازن وەزۊترین وەخت، ئەو چشتەیلە لە پڕتاڵ و ئیکسیسوار ئەرا خوەیان بسینن، وەگەرد چشتەیلیگ تریش ئەرا ئی کەرنەڤاڵ خوەشە لەلای گشت کەسیگ.
ئاژانس شەفەق نیوز گەردیە ناو بازاڕەیل شار سلێمانی، وەتایبەت بازاڕەیل پەڕوو ک هەکاتی پێشانگایگ شیوەکاری ئەرا تابلۆیل هونەری رەنگینیگ دەرکەفت، وە رەنگاوڕەنگی ئەو پارچە پەڕووەیلە ک لەناو و دەیشت دوکانەیل پڕتاڵ ژنانە نمایش کریانە.
ئارام عەلی، خاوەن دوکان پارچە پەڕوو ژنانەس، ئەرا ئاژانس شەفەق نیوز ئۊشێد: جۊلەی بازاڕەگە وەگورەی ئەو رووژەیل داڵەگە فرەترە، ک هاتنیان ئەرا سەنین دڵنگ کوردی لە مانگ کانوون دۊەم تا مانگ نیسان لە هەر ساڵیگ دەسوەپی کەێد، و لەمانگ شوبات تا ناوڕاس ئادار وەبوونەی جەژن نەوروز جۊلەگە زیاترەو بوود.
هەمیش ئۊشێد: ئەو ژنەیلە گشت ئی ماوە تەقەلا دەن چشتیگ نوو و رەنگین لە پڕتاڵ وەڕەنگ وەهار و گوڵ پەسەن بکەن، تا لەی بوون خوەشە بپووشنەی، وەگەرد ئەوە ک فرە لە خیزانەیل پڕتال ئەرا وەرز تاوسان ئایندەیش هەڵگرن، و هەمیش پڕتال ئەرا دیاری برادەر و کەسوکارەیل لەدەیشت عراق پەسەن کەن.
دەربارەی چینەیل پارچە پەڕوو و رەنگەیلی، عەلی ئۊشێد: پارچەی (ساتان) هەمیشە ئەرا شواڕانەک کوردی ژنانە وەکار تیەێد، و هەمیش (قەدیفە) ک ئەرا (کەوا) و (پولکە) وە چشتەیلیگتر وەکار تیەێد، و گشتی هالە ناو پارچەیل دڵنگ کوردی.
لەباوەت رەنگەیل پارچەیلە، خاوەن دوکانەگە ئۊشێد: رەنگ (بادینانی) و ڕەنگ (سۆرانی) هەس، ک ئەو دوو ناوچە وەپیان جیاوازن، باوجی فرەی ژنەیلە رەنگ زەرد و سوور و سیا و زیوی پەسەن کەن.
لەباوەت کەم پۊلی ک لەماوەی مانگ گوزەشتە کەفتە ناو هەرێم کوردستان، و شایەت ئی مانگیشە، و کاریگەریی لەبان خەڵکەگە، وەتایبەت فەرمانبەرەیل لەوەر دیرکەفتن مووچەیان، عەلی ئۊشێد: ئەو قەیران ئابووریە ک شار سلێمانی وەخوەی دۊنێد، ک هیشت جۊلەی فرووشتن و سەنین کەمەو بوود، وتیش: فرەی ئەو خیزانەیلە ک تیەنە دوکانەێلمان ناچار بۊن وەقەرز چشت بسینن، ک جاروبار دەسپاچەیان کەێد.
بەشیگ لەو ژنەیلە ک خوەشیان بەهات ناویان ئاشکرا بوود، ئەرا ئاژانس شەفەق نیوز وتن: ئی ماوە لە هەر ساڵێگ هاتن ئەرا سەنین لە هەروەختیگ تر زیاتر وەخوەی دۊنێد، ئەوەیش وەبوونەی جەژن نەوروز لەلاییگ، و هەمیش لە وەرز تاوسانیش، ک پرتاڵ تاوسانی فرەیگ خوازێد.
مەریەم حەسن ک خوەی مامووستاس، ئۊشێد " هەمیشە چاشیایمنە ک ئامادەکاری ئەرا نەوروز بکەیمن، و ئمڕوو هامە بازاڕ تا پارچە پەڕوویگ ئەرا ئی بوونە پەسەن بکەم، تا بکەمەی قاتیگ کوردی، وتیش : رەنگەیل زاق جۊر وەنەوشەیی و زەرد پەسەن کەێد.
