كۆمپانيايگ ئيماراتى له مسر ده‌رچى و روێ له كوردستان كرد
شه‌فه‌ق نيوز/ كۆمپانياى كريسينت پترۆليۆم ئيماراتى، ئاشكراى ئه‌وه كرد ك ئه‌خوازێد به‌رهه‌م غاز بڕه‌سنێده نزيكه‌ى يه‌ك مليار مه‌تر سێجا غاز سروشتى له هه‌رێم كوردستان له رووژيگ وه‌ل هاتن ساڵ 2023.
له‌ى باوه‌ته‌و، مه‌جيد جه‌عفه‌ر وه‌ريه‌وبه‌ر كۆمپانياى ناوبرياێ ئه‌وه ده‌رخست ك هوير له‌وه ئه‌كه‌ن به‌شيگ له پرووژه‌يليان له باكوور ئه‌فريقيا وه‌تايبه‌ت له مسر بيلنه‌جێ و به‌شيگ له‌لى ئه‌را فرووستن نمايش كردنه تا ته‌ركيز له‌بان هه‌رێم كوردستان و عراق.
وه‌گووره‌ى ئاماريگ ئابوورى ئه‌را خوه‌رهه‌ڵات ناوين(MEES)، جه‌عفه‌ر باس له كار كۆمپانياگه كرد له سه‌رچه‌وه‌ى كۆرمۆر و وت: هيمان كار له‌وه‌ر به‌رزه‌وكردن ئاست به‌رهه‌مهاوردن غاز سروشتى ئه‌كه‌يم ئه‌را زياتر له 400 مليۆن مه‌تر سێجا و ئوميده‌واريم وه‌ل هاتن ساڵ 2021 به‌رهه‌م رووژانه زياتره‌و بكريه‌ێد وه بڕ 250 مليۆن مه‌تر سێجا و 250 مليۆن مه‌تر سێجاى تر له ساڵ دوياتر.
جه‌عفه‌ر له‌باره‌ى لويله‌يل جيوازكه‌ر غاز ئه‌را توركيا وت: كاركردن له‌و باوه‌ته‌و پيشكه‌فتن وه‌خوه‌يه‌و دوينێد و ريڕه‌و لويله‌يل ديارێ كرياگه‌و ئه‌وله‌ويه‌ت ئيسه‌مان له كار ئه‌وه‌سه هه‌وه‌جه‌يل دهۆك دابين بكه‌يم ك ويستگه‌يگ غازى له‌تى وجوود ديرێد ئه‌را به‌رهه‌مهاوردن وزه‌ى كاره‌باو هه‌وه‌جه وه غاز ديرێد.
