كوردستان.. داواكارى ئه‌را وازكردنه‌وه‌ى مزگفته‌يل له ره‌مه‌زان
شه‌فه‌ق نيوز/ زانايه‌يل ئايينى و حزب ئسلامى كوردستانى، داوا له حكومه‌ت هه‌رێم كردن چه‌ويگ بخشنێده بڕيار داخستن مزگفته‌يل هه‌رێم وه‌بوونه‌ى په‌تاى كۆرۆنا و له‌نوو وازيان بكا له‌وه‌ر مقه‌يه‌تيكردن له حاڵه‌ته‌يل ده‌روينى موسڵمانه‌يل وه‌ل هاتن مانگ ره‌مه‌زان پيرووز، جه‌خت له‌وه‌يش كردن مقه‌يه‌تى له رێ وشوونه‌يل ته‌ندروستى روێ وه‌ڕوێ بوينه‌وه‌ى په‌تاگه‌يش بكريه‌يد و باس له‌وه كردن ك وازكردن مزگفته‌يل خوه‌شى ئه‌خاده دڵ نمازخوه‌نه‌يل.
له‌ى باوه‌ته‌و، نويسينگه‌ى جيوه‌جيكار يه‌كێى زانايه‌يل ئايينى له به‌ياننامه‌يگ ئه‌را شه‌فه‌ق نيوز وت: ئاشكراى له‌لاى گشت كه‌سيگ ك مزگفته‌يل له نمازخوه‌نه‌يل به‌تاڵه‌و نماز جومعه و جه‌ماعه‌ت و خوداپه‌رسى وه‌جه‌م له‌تيان داخرياگه‌و يه‌يش بويه‌سه هووكار ئه‌وه‌گ هاووڵاتيه‌يل وه دڵ ته‌نگ پيشوازى له مانگ ره‌مه‌زان بكه‌ن.
به‌ياننامه‌گه يه‌يش ده‌رخست و وت: وه‌ناو يه‌كێتى و گشت زانايه‌يل ئايينى و گشت موسڵمانه‌يل كوردستانى، داوا له سه‌رۆكايه‌تى ئه‌نجومه‌ن وه‌زيره‌يل و ليژنه‌ى باڵاى روێ وه‌ڕوێ بوينه‌وه‌ى كۆرۆنا ئه‌كه‌يم چه‌ويگ وه بڕياره‌گه بخشننه‌وه‌و هه‌وڵ بيه‌ن بڕه‌سنه‌و له ده‌روين شه‌كه‌ت موسڵمانه‌يل و خوه‌شه‌ويستييان ئه‌را نماز جومعه‌و جه‌ماعه‌ت و ته‌راويح و قاپى مزگفته‌يل له‌نوو واز بكريه‌ێد.
