كوردستان بريار له‌باره‌ى وه‌رنه‌گرتن ئيجار و قه‌رزه‌يل ماوه‌ى قه‌يه‌غه‌ى هاتوچوو ده‌ركرد
شه‌فه‌ق نيوز/ حكومه‌ت هه‌رێم كوردستان، بڕيار له‌باره‌ى خوه‌شبوين له كه‌رته‌يل فراوانيگ له كۆمه‌ڵگا ده‌ركرد له قه‌رز و شايسته‌يل دارايى كه‌ڵه‌كه‌بوێ له ماوه‌ى وسيان كاره‌يليان وه‌بوونه‌ى چه‌سپانن قه‌يه‌غه‌ى هاتوچوو له‌ئه‌نجام بڵاوبوينه‌وه‌ى ڤايرۆس كۆرۆنا.
حكومه‌ت له به‌ياننامه‌يگ ئه‌را ئاژانس شه‌فه‌ق نيوز وت: له‌وه‌ر خاتر كه‌مه‌وكردن مه‌ينه‌تيه‌يل ئه‌و لايه‌نه‌يله ك زه‌ره‌دمه‌ن بوينه وه بوونه‌ى قه‌يه‌غه‌ى هاتوچوو له ڤايرۆس كۆرۆنا، بڕيار وه‌خشين ئيجارنشينه‌يل له موڵكه‌يل حكومى دا له‌و ماوه ك كار له‌تى وسياگه وه بوونه‌ى قه‌يه‌غه‌ى هاتوچوو.
به‌ياننامه‌گه هه‌ميش وت: هاووڵاتيه‌يل وه‌خشيه‌ن له دوياكه‌فتن قه‌رزه‌يل له‌وه‌گ ها لايان له‌وه‌ر پابه‌ندنه‌وين ياسايى وه‌رانوه‌ر ده‌زگايه‌يل حكومى ك ريككه‌فت بويه وه‌ل ماوه‌ى بڕيار قه‌يه‌غه‌ى هاتوچوو و هه‌ر وه‌و خاتريشه ئاگادار ده‌زگايل باجداين كرياگه ئه‌و ماوه حساو نه‌كريه‌ێد له‌بانيان وه‌ل داوه‌زانن 15% له سلفه‌يل حكومه‌ت ك ها زمه‌ت هاووڵاتيه‌يل جوور(سلفه‌ى عه‌قار و هاوسه‌رگيرى و قه‌رزه‌يل بويچگ و سلفه‌ى بانك كشتوكاڵى و پرووژه‌يل پيشه‌سازى و گه‌شتيارى)وه مه‌رجيگ هاووڵاتيه‌يل ئاماده بوون تا 15ى ته‌مووز ئاينده ئه‌و قه‌رزه‌يل بيه‌نه‌وه.
