كاكه حەمه: سەردان نێچیروان بارزانی ئەرا ئیران یەخ ناوەین تەهران و هەولێر تاوانەو
کاکە حەمە لە قسەیلی ئەرا ئێزگەی دەنگ ئەمریکا وە زوان کوردی وتیش: دویای سەردان نێچیروان بارزانی ئەرا ئیران، توەنست ئەو یەخە بتاونێدەو کە لە پەیوەندیە ناوەین ئیران و هەرێم کوردستان تا ماوەیگ دیار بوی.
لە باوەت دیدار نێچیروان بارزانی وەرد ریبەر باڵا کاکە حەمە وت: ئاسان نییە ئەرا بەشیگ لە سەرۆک دەوڵەتەیل چەویان بکەفێدە ریبەر باڵای کۆمار ئیسلامی ئیران، وەلێ ئیمە دیمن چوین پیشوازی لە سەرۆک هەرێم کوردستان وەلایەن ئایەتوڵڵا عەلی خامەنەئی کریا.
وتیش: هەرلە هەرێم کوردستان و ئیران رەسینە ئەو باوەڕە کە هەردوگیان پێویستن وەوەکە.
لە سەرەتای مانگ ئایار گوزەشتە، نێچیروان بارزانی سەرۆک هەرێم کوردستان سەردانیگ ئەرا ئیران کرد، و لەناوی چەوی کەفتە ئایەتوڵڵا عەلی خامەنەئی ریبەر ئیران، و کووچکردگ ئیبراهیم رەئیسی سەرۆک ئیران، و محمد باقر قالیباف سەرۆک پەرلەمان ئیران، وەگەرد گەورە وەرپرسەیل ترەک.
سەرۆک نێچیروان بارزانی لە دیداری وەرد ئایەتوڵڵا خامەنەئی، باس ئامادەیی هەرێم کوردستان و ئارەزووی کرد ئەرا قایمکردن پەیوەندییەیل وەرد کۆمار ئیسلامی ئیران لە گشت چینەیل.
