قەیران مووچە و رەوش ئابوری...دیارترین ئارەزووەیل خەڵک سلێمانی ئەرا ساڵ نوو (وینە)

شەفەق نیوز/ لەناو ئامادەکاری و ئاهەنگەیل پیشوازیکردن لە ساڵ نوو، دویای ئەوەگ ساڵ ٢٠٢٤ لەپسا رەسێدە پایان، خواست و ئارەزوو هاوڵاتیەیل بویەسە دیارترین سیما لەی رووژەیلە وەتایبەت لە پارێزگای سلێمانی، جویر خواست چارەسەرکردن قەیران مووچە و رەوش ئابووری وەرکە ئەوانەی ترەک، جویر رەسین وە سەقامگیری و دروسکردن حکومەت هەرێم کوردستان. 

هەرچەن شار سلێمانی وە یەکیگ لە شارە تاڕادەیگ ئارامترین شارەیل عراق ناسریاس، بەڵام نیگەرانی لە ئاسایش گشتی مەنیە، جویر ئەوەگ ئەحمەد جەلال، خاوەن دوکانیگ لە سلێمانی ئەرا پەیامنێر شەفەق نیوز وت: ئیمە لە ناوچەیگ ئارامتر لە ناوچەیل ترەک ژیەیمن، بەڵام نەوین سەقامگیری لە "پرسە سیاسی و ئابوورییەل هیلێد هەس بکەیمن کە ئی ئاسایشە هاتێ ووردەوام نەوود."

هەر لە باوەت ئەمنی، هاوڕێ کارزان، چالاکوان مەدەنی لە قسەیلی ئەرا ئاژانس شەفەق نیوز وت: “ئومید خوازیمن تەقەلایل ئەمنییەکانی حکومەت لەماوەی ساڵ نوو، نەک تەنیا لە کوردستان بەڵام لە گشت عراق قایمتر بکریەن”. ئومید دیرن سەقامگیری لە سوریا وەدی باێد،  کە برایل کورد لەناوی ئازار دوینن”. 

 ئەرا تیکە نانەگە

 ساڵانیگە مووچەی فەرمانبەرەیل هەرێم دوای کەفێد، تا ئەو ڕادە ئی باوەتە بویەسە وڕینە و نیگەرانی هاوڵاتیەیل هەرێم، ئامارەیلیش دەسنیشان ئەوە کەن کە 30% فەرمانبەرەیل حکومەت لەماوەی چەن مانگ گوزەشتە ناچاربوین قەرز بکەن ئەرا چشتە سەرەتاییەیل.

 سامان شێرزاد، مامووستا لە مەکتەویگ حکومی لە سلێمانی، ئەرا پەیامنێر شەفەق نیوز وت: "رەوشەگە بویەسە چشتیگ کە بەجەر نیەکریەێد، چەن مانگیگ چەوەڕی وەرگردن مووچەگانمان کەیمن، هەناێ وەریگریمن، لەلی بڕیەێد یا بەس نیە، کە ئیرنگە هایمنە دویادویای ساڵ ٢٠٢٤ و تەنیا دە مووچە بردیمنە و هیچکامیان لە مەوقەی خوەی نەهاتیە".

 وەزارەت دارایی لە هەرێم کوردستان لەی دویاییە لە بەیاننامەیگ فەرمی راگەیان کە لەوەر کەمی داهات و سیاسەتە داراییەیل بەغداو، حکومەت کەفتیەسە ئاستەنگی دارایی، بەڵام کار کەێد ئەرا دابینکردن چارەسەری وەردەوام وە هاوکاری وەرد بەغدا. 

 قەیران دارایی ئیسە ئەرا هەرێم نوو نییە، بەڵام لەی دویاییە بەدترەو بویە، و بویەسە مدوو بەرزبوین نرخ بەرهەم وەگەرد نەوین یا گەشەسەنین داهات وە قسەی زەینەب محمد، خانم ماڵ، “نرخ لە بازاڕ وەردەوام لە بەرزەوبوینە، لە وەختیگ داهات جویر خوەیە، و تەنانەت چشتە سەرەتاییەیل بوینەسە بارگرانی لەمل خیزانەیل”.

لەی باوەتە، توێژەر ئابووری فەرید محمد ئەرا ئاژانس شەفەق نیوز ئاشکرا کەێد کە “قەیران دارایی چارەسەری هەمەلایەنە خوازێد، جویر هەمەچەشنکردن سەرچەوەیل داهات و هاندان بەرهەمهاوردن ناوخۆیی، کوردستانیش  چاکسازیی ریشەیی ئابووری خوازێد، زەتایبەتی کە بەغدا دەسکردیە وە جڵەوکردن سەرچەوەیل ئابوورییەگەی هەر لەوەر یە ئەرام دەرکەفێد کە خاسترکردن "رەوش ئابووری ئیسە تاڕادەی فرەیگ کەفێدە گەردن وەرپرسیارێتی بەغدا".

لەلای خوەییش، عەدنان مستەفا، کراکار بیناسازی ئویشێد: “ئەوسا گشت رووژیگ کارم داشتم، بەڵام ئیڕنگە لەوەر قەیران ئابوورییە کار کەمەو بویە، مینەی هەر دەرفەتیگ کار کەم تا تیکە نانیگ ئەرا مناڵەیلم درارم”. 

 لەلای خوەییش، رەوان کەمال، دەرچگ زانکۆی بیکارە، ئویشێد: دویای تەواوکردن خوەنەواری فرە خەون وە بانانیگ رووشن دیم، بەڵام راسیەگە لەوە قورسترە کە چەوەڕیی کردیام، گشت دەرەیل بەسیانە، کووچبەری بویەسە تاکە رییگ لە وەردەم ئیمە.” 

 حکومەتیگ کە نوێنەرایەتی گشتی بکەێد 

 دروسکردن حکومەت هەرێم کوردستان بەشیگ بوی لە خواستەیل خەڵک سلێمانی، تەنانەت وە گرنگ دانریا، ئەرا مسۆگەرکردن ماف گشت لایگ، ریاز مەحمود، چاودێر کاروبار سیاسی لە سلێمانی ئەرا ئاژانس شەفەق نیوز وت: “ئەو دویاکەفتنە لە دروسکردن حکومەتیگ نیشتمانی کە نوێنەرایەتی گشت لایەنە سیاسییەیل بکەێد مدوو سەرەکیە ئەرا دووارەبوین قەیرانەیل لەی دویاییە".

 ئویشێد:  ئیدارەیگ خوازیمن کە رێز لە فرەیی بگرێد و هاوسەنگی لە ناوەین گشت پارێزگایل بکەێد". 

 هودا رەسووڵ، مامووستا لە سلێمانی لە قسەیلی وت: “بایەسە حکومەت نیشتمانی کار ئەرا خاسترکردن پەیوەندی ناوەین هەولێر و بەغدا بکەێد، وەشیوەیگ کە سەقامگیری هەرێم و مافەیل گەلەگەی مسۆگەر بکەێد ئیمەیش ئومید خوازیمن تەقەلایل ئەرا پشتیوانیکردن لە کوردەیل لە سوریا و پیدان مافەیلیان دویر لە جەنگ بوود.

 با خەڵک سلێمانی وە خەون و ئومید گەورەوە بچنە ناو ساڵ ٢٠٢٥ ئەرا رەسین وە ئاسایش و سەقامگیری، و کۆتایی وە ئازار رووژانە  گریەدارە وە بڕیار سیاسی و پلان ئابووری، تا ساڵ نوو بوودە سەرەتایگ نوو ئەرا ئەوان و بنەماڵەیان، و نەک تەنیا ساڵیگ ترەک لە ئازار.