فرۆکەیل تورکیا پەلامار "پەکەکە" دەن و دیارنەمەنن 3 گەنج لە "ئامێدی" دهۆک
2024-06-13T13:03:44+00:00
شەفەق نیوز/ سەرچەوەیگ سەربازی، ئمڕوو پەنجشەممە، خەوەردا فرۆکەیل جەنگی تورکیا پەلاماریگ ئاسمانی وەبان شوینەیل پەکەکە ئەنجامدان لە قەزای ئامێدی شار دهۆک لەهەمان وەخت سەرچەوەیگ ئەمنی خەوەردا لە بیسەروشوینی 3 گەنج لە قەزاگە.
سەرچەوەیگ سەربازی وە ئاژانس شەفەق نیوز وت "فرۆکە جەنگیەیل تورکیا لوتکە کویەی گارە پەلاماردانە کە کەفێدە بان ئامێدی، وەبی ئەوەی بڕ زەردەیل پەلامارەگە بزانرێد".
هەمیش، سەرچەوەی ترەک لە پۆلیس قەزای ئامێدی خەوەردا لە دیارنەمان سێ گەنج لە ناحیەی شیلادزێ سەر وە قەزای ئامێدی ئەرا ماوەی چوار رووژ.
مامەی یەکیگ لە گەنجەیل ئەرا ئاژانس شەفەق نیوز دووپاتکرد "ئەو گەنجەیلە وەرجە چوار رووژلە شیلادزێ دەرچینە، لە ساعەت یانزەی شەو هەمان رووژ پەیوەنی وەگەردیان بڕیاس".
وتیش "ئەو سێ گەنجە تەمەنیان لەناوەین 22 و 25 ساڵن و خێزانەیلیاا پۆلیس خەوەردارکردنە لە دیارنەمانیان، باوجی تا ئیسە پرۆسەیل مینەکردنەیل نەتوەنستنە پەیایان بکەن یا خەوەریگ لەلیان بزانن".
