شووڕشیگ وەنەوشەیی لە کوردستان... بەشدارییگ فرە لە گشت شارەیل هەرێم لە بنکەیل دەنگدان

شەفەق نیوز/ فرە لە دەنگدەران وە شمارەی گەورەیگ دەسکردنە رەسین وە بنکەیل دەنگدان، لە گشت شارەیل هەرێم کوردستان، وەگەرد رەسین پڕۆسەی دەنگدان گشتی ئەرا هەڵوژاردن پەرلەمان کوردستان رەسیە لوتکە. 

 پەیامنێر ئاژانس شەفەق نیوز وت؛ بنکەیل دەنگدان لە شار هەولێر پایتەخت هەرێم کوردستان، لە سەعاتەیل زویەو وەرد وازکردن سەندووقەیل دەنگدان، بەشداری دەنگدەرەیل وەخوەی دی، لەبان سەرهەڵدان کێشەی تەکنیکی لە بەشیگ وێستگە.  

کامەران (دەنگدەریگە لە هەولێر) ئەرا ئاژانس شەفەق نیوز وت: “پرۆسەی دەنگدان وە خاسی و وەڕیەو چوود، پرۆسەگەیش تەنیا چەن خولەکیگ خوازێد تا دەنگدەر دەنگ خوەی بەێد”.

 وە بەشداری هاوڵاتیەیل لە هەڵوژاردن تا دڵنیایی وە لایەن گونجیاگ بیەن، و ئاڵشتبونیگ وەرەو خاستر”. 

لەلای خوەییش ئەردەڵان (دەنگدەریگ کورد) ئەرا ئاژانسەگە وت: “بەشداریکردن لە هەڵەژاردن گرنگە، ئومید خوازم هاووڵاتیەیل خوەیان لە دەنگدان دویر نەگرن، کە ئومیدەیل جادەی کوردی لەبان ئەوە وسیەێد کە حکومەت هاتگ بتوەنێد چارەسەرکردن کێشەیل بکەێد، وەتایبەتی کێشە ئابوورییەیل، جویر مووچە و ئەوانەی ترەک، چوینکە وە جویریگ کاریگەری بەد  لەبان هاووڵاتیەیل بویە”.

 دیمەن ھەولێر جیاواز نەوی وەرد ئەو شارەیل ھەرێم کوردستان، کە پارێزگایل دھۆک و ھەڵەبجە و سلێمانی بەشدارییگ فرە وەخوەیان دین لە بنکەیل دەنگدان تا دەنگ خوەیان بیەن.

بڕ گشتی دەنگدەرەیل هەرێم کوردستان دوو ملیۆن و ٨٩٩ هەزار و ٥٧٨ دەنگدەرە، کە ٢١٥ هەزار و ٩٦٠ کەسیان ماف دەنگدان دیرن لە دەنگدان تایبەت و دوو ملیۆن و ٦٨٣ هەزار و ٦١٨ دەنگدەریش ئمڕوو یەکشەممە لە دەنگدان گشتی دەنگ دەن.

 پرۆسەی دەنگدان گشتی ئەرا هەڵوژاردن پەرلەمان کوردستان لە خول شەشەمی، شەوەکی ئمڕوو یەکشەممە لە هەرێم کوردستان دەسوەپی کرد دویای کۆتاییهاتن دەنگدان تایبەت ئەرا هیزە سەربازی و ئەمنییەیل پیرەکە جمعە .

ساعەت هەفت شەوەکی، کۆمسیۆن باڵای سەروەخوەی هەڵوژاردن لە عراق دەر هەزار و ٦٢٢ ناوەند دەنگدان گشتی لەڕوی خەڵک ناوچە و شارەیل هەرێم واز کرد کە ماف دەنگدان دیرن، کە لە بڕ گشتی دەنگدەرەیل دوو ملیۆن و ٦٨٣ هەزار و ٦١٨ دەنگدەرن لە 2,899,578 دەنگدەر.

کۆمسیۆن باڵای سەروەخوەی هەڵوژاردن پیرەکە جمعە راگەیان کە لە سەد 97ی دەنگدەرەیل دەنگدان تایبەت، لە بڕ 215 هەزار و 960 ئەندام هیز پێشمەرگە و ئاسایش ناوخۆ، دەنگ دانە، دووپاتیش کرد کە پڕۆسەی دەنگدان تایبەت وە نەرمی وەبی سەرپێچییگ وەرچەو وەڕیەو چگ.

 1091 کاندید لە هەردوگ ڕەگەز لە هەرێم کوردستان کێبڕکێ کەن ئەرا 100 کورسی کە پەنج کورسییان "کۆتا"س ئەرا پێکهاتەیل، کە لە 11 کورسی کەمەو کریاس، کە وە بڕیار دادگای باڵای فیدراڵی (بەرزترین دەسەڵات دادوەری لە عراق کەمەو کریا ).