شوین "تووپ خوینین" ها گشت شوینیگ لە سەیرانگای بەرخ لە زاخۆ.. وینە و ڤیدیۆ
شەفەق نیوز/ یە سێ رووژە لەبان ئەو تووپواران مەرگبارە رەد بویە، لەبان سەیرانگای بەرخ لە ئیدارەی زاخۆ لە هەرێم کوردستان، و هیمان شوین گورزەگە، وپارچە لەشەیل فڕەبەسیاگ لە قوربانیەیل و پڕتاڵیان لەو شوینە مەنیە.
بەرخ، شوینیگ گەشتیارەی سرووشتیە، کەفێدە ناو چوار شوین گەشتیارەی سرووشتی لە ئیدارەی سەروەخوەی زاخۆ، ک چوارشەممەی گوزەشتە، کەفتە وەر تووپواران، بویە هووکار نۆ قوربانی وزیاتر لە بیس زەخمدار.
مەسعود عەلی خاوەن سەیرانگاگە ئەرا ئاژانس شەفەق نیوز وت: ناوچەیلیگ گەشتوگوزاری فرەیگ لە زاخۆ هەس جویر (بەرخ، شەرانش، بهێری، دەشتە تەخ) وگشتیان وەبی هویچ گرفتیگ پیشوازی لە گەشتیارەیل کەن.
خاوەن سەیرانگاگە داوا لە لایەنەیل پەیوەندیدار کرد تەقەلایان ئەرا وسانن گورزەیل هەڕەمەکی لەبان ناوچەگە بیەن، و دیاری کرد ک شمارەیل فرەیگ هاتیانە ناوچەگە وە دەیان پاس.
عەلی توومەتبار لایەن جیوەجیکەر تووپوارانەگە لەبان سەیرانگاگەی کرد ک گەشتوگوزاری لە زاخۆ و دهۆک و هەرێم کوردستان کەێدە ئامانج، وتیش: تووپەیل وە ماوەی چەن چرکەیگ مناڵ وژنەیلیگ کوشت، ک یەک گولە کەفتە ناو گوڵەم ئاویگ مناڵەیل لەناوی بازی کردیان، و تا دویەکە دەس بڕیای مناڵیگ لەناو ئاوەگە پەیا کریا.
لە کۆتایی، مەسعود سەرخوەشی لە کەسوکارەیل قوربانیەیل کرد، وداوای بیوەیی ئەرا زەخمدارەیل کرد، ودووپات کرد ک زەرەدەیل دارایی هویچیگ نییە وەرانوەر ئەو خوینە ک لە رووژ ئەو تووپواران مەرگبارە رشیا.
