شمارەی کوشیاگەیل کۆرمۆر بەرزەو بوود.. ڕۆمانسکی داوا لە دەسەڵاتدارەیل عراق کەێد "وە تەواوی لێکۆڵینەوە بکەن"
رەمک ڕەمەزان، سەرۆک شارەوانی چەمچەماڵ لە ئاشکراکردنی کە رەسیە ئاژانسی شەفەق نیوز وت: شمارەی کوشیاگەیل ئەرا چوار کەس بەرزەو بویە، بیجگە لە زەخمداری دوو کەسی، وتیش: تەندروسی زەخمدارەیل جیگیرە.
رەمەزان دیاری کرد کە کە ئەو شەش قوربانییە (زەخمدار و کوشیای) لە رەگەزنامەی یەمەن بوین.
وتیش: وەرگری ئاسمان ئەرک دەسەڵاتدارەیل هەرێم نییە، بەڵکم ئەرک حکومەت فیدراڵییە، داوا لەلی کرد لێکۆڵینەوە ئەنجامبەێد و ریگری لە دووارەبوین ئەو پەلامارە بکەێد.
سەرۆک شارەوانی چەمچەماڵ دووپات کرد، شاندیگ وەزارەت کارەبا رەسیە شوین رویداوەگە ئەرا چارەسەرکردن پرس کەمکردن بەرهەم کارەبا وە بڕ دوو هەزار و 500 مێگاوات.
لەلای خوەییش ئالینا ڕۆمانسکی باڵیۆز ئەمریکا لە بەغدا وت: وە زبری ئیدانەی ئەو پەلامارە کەیمن کە دویەشەو ژیرخانی وزە لە هەرێم کوردستانی عراق کردە ئامانج.
خانمە باڵیۆز ئەمریکا هاوخەمی خوەی ئەرا ئەو کەسەیلە نشان دا کە بوینە قوربانی، و دووپات کرد کە ئەمریکا وەردەوام بوود لە کارکردن وەرد حکومەت عراق و حکومەت هەرێم کوردستان ئەرا پشتیوانیکردن لە ئاسایش و سەقامگیری و سەروەری عراق.
نێچیرڤان بارزانی، سەرۆک هەرێم کوردستان دووپات لە گرنگی جیوەجیکردن ئەرک حکومەت فیدراڵ کرد، ئەرا ڕیگریکردن لە پەلامار وەبان دامەزراوە گرنگەیل هەرێم.
مەسرور بارزانی سەرۆک حکومەت ھەرێم داوا لە حکومەت فیدراڵی کرد وەدویاچگن جددی بکەێد و سزای تاوانبارەیل بەێد و خەڵک ھەرێم کوردستان دڵنیا بکەێد.
دویەکە جمعە، پەلاماریگ نەناسیای کێڵگەیگ غاز کردە ئامانج لە قەزای چەمچەماڵ لە پارێزگای سلێمانی لە سنوور هەرێم کوردستان.
پەلامارەگە بویە هوکار وسیان بەرهەم غاز و کەمەوبوین بەرهەمکردن کارەبا وە بڕ 2500 مێگاوات.
