پیشمەرگە مقیەتی درەو گەنم کەێد لە خانەقین
موقەدەم جەلال مام فایق فەرماندەی فەوج دویەم لە لیوای سێیەم پیشمەرگە وت: هیزەیل پیشمەرگە لە زیاتر لە ١٠ ئاوای کشتوکاڵی لە ناوچەی دەکات بڵاو بوینە، تا رەسێدە ناوجەی ساڵح ئاغا لە باکوور خوەرھەڵات خانەقین لەبان سنووری وەگەرد کەلار، ئەرا مقیەتیکردن هەڵمەت درەو گەنم وە هەماهەنگی وەرد وەرگری شارستانی و فەرمانگەی پەیوەندیدار.
فایق ئەرا ئاژانس شەفەق نیوز وت: پلان مقیەتیکردن وە هەماهەنگی بەرزیگ وەرد هیزەیل ئەمنی و فەرمانگەیل کشتوکاڵی لە دیالە وەڕیەو چوود، وەبی هویچ رویداویگ یا گیچەڵیگ، و تا ئیسە هویچ سزیانیگ توومار نەکریاگە.
فایق وتیش: پلانەگە وە بڵاوکردن دەوریەیل وسیاگ و جویلەکەر و روانگەی هەواڵگری وەردەوامیگ وەڕیەو چوود، ئەرا نواگردن هەر تەقەلایگ یا جویلەی خراوەکاری لەبان هەڵمەت درەو.
رووژ چوارشەممەی گوزەشتە، وەڕیەوبەرایەتی کشتوکاڵی خانەقین سەروە هەرێم کوردستان، دەسکردن وە هەڵمەت درەوکردن گەنم لەناوچەیل ناوەین قەزاگە و دەورگرد یەکەی گەرمیان راگەیان.
