پێشمەرگە باس ئاڵشتبوین شیوەی نوو جەنگ داعش و رێککەفتن وەگەرد سوپا کەێد
شەفەق نیوز/ وەزارت پێشمەرگە، ئمڕوو چوارشەممە، راگەیان شەهیدبوین یەکیگ لە هێزەیلی لە پەلاماریگ لەلایەن ریخریاگ داعش لە قەزای کفری، و هووشداری کرد ک ریخریاگ داعش شیوەی جەنگکردنی ئاڵشت کردیە ک بوودە جی وەردەوامی مەترسیەیلی، و داواکردنی وە رێککەفتنیگ گشتگیر وەگەرد هێزەیل سوپای عراق نووەو کرد ئەرا پڕەوکردن بووشاییە ئەمنیەکان لە ناوچە دابڕیایەکان.
وەزارەتەگە لەبەیانامەیگ رەسیە ئاژانس شەفەق نیوز وت: وە دریژەی ماوەی گوزەیشتە، ئەرا چەن جاریگ هووشداری لە بۆشاییە ئەمنیەگە لەناوبەین پێشمەرگە و سوپا کردیمن، و لەوەر ئەوە ریخریاگ داعش توێنست رزەیل خوەی رێکەو بکەێد، و بڕ و مەفرەزەیلیگ جووراجور دروس کرد، و بەڵگەی ئی قسە ئەوەسە ک ریخریایەگە هەر ماوەی جاریگ کارە خوێڕیانەیلی جیوەجی کەێد.
بەیاننامەگە نشان دا ک لە ساعەت ١٠:٣٠ شەو ١١ی ئایار ٢٠٢١، تیرۆرستەیل پەلامار سەنگەرەیل لیوای ١١٦ ی هێزەیل پێشمەرگەی کوردستان لە سنوور قەزای کفری دان، و لەوەر ئەو پەلامارە، ئەندامیگ لە پێشمەرگە (محسن حسێن گرویی) شەهید بوی، و دووپات کرد ک نوای پەلامارەگە گریا.
بەیاننامەگە وتیش: دووارە دووپات کەیمن ک جوولەی تیرۆرستەیل هالە زیایبوین، و شیوەی جەنگ و پەلاماریان ئاڵشت کردن و بوینە مەترسی وەردەوامیگ.
بەیاننامەگە هەمیش وت: لەیراو دووپات کەیمن و ئەرا نواگردن لە دووارەبوین ئیجوور رووداوەیلیگ، و لەناوبردن تیرۆر وەیەکجاری، رێککەفتن گشتگیر و فراوانیگ وەگەرد سوپای عراق خوازیمن.
بەیاننامەگە جەخت کرد ک هێزەیل پێشمەرگە وەرانەوەر ئەو کردەوەیلە بیدەنگ نێەوون و ئەوەسا لە وەخت گونجیاگ وە سەختی وەڵام دەێد، و دڵنیای گەل کوردستان کەیمن ک ئاسایشیان ئەرا هەمیشە وە ئارام مینێد، و پێشمەرگە ئەرا گشتی جی باوەڕ و دڵنیاییە.
