شاند گله‌وخواردگ هه‌رێم كوردستان له به‌غدا دانيشتن هه‌ردوگ حزب سه‌ره‌كى دوياخست
شه‌فه‌ق نيوز/ دانيشن ناونى هه‌ردوگ مه‌كته‌ب سياسى پارت ديموكرات كوردستان و يه‌كێتى نيشمانى كوردستان، ئه‌را وه‌خته‌يليگ تر دويا خريا.
له‌ى باوه‌ته‌و سه‌رچه‌وه‌يگ ئاگادار له باسيگ ئه‌را شه‌فه‌ق نيوز وت: دوياخستن ديدار ناونى هه‌ردوگ حزب سه‌ره‌كى وه‌بوونه‌ى ئه‌وه بويه ك ئه‌نجومه‌ن وه‌زيره‌يل هه‌رێم كوردستان دانيشتنيگ وه‌ل شانده‌گه‌ى ساز كردگه ك له‌ى دوياخره سه‌ردان به‌غدا كرد.
سه‌رچه‌وه‌گه يه‌يش ده‌رخست ك ئه‌نجومه‌ن وه‌زيره‌يل له‌وه‌ر ئاگاداربوين له ده‌رئه‌نجام گفتگووه‌يل شانده دانيشێد ك ئه‌نجامى داگه له به‌غدا وه‌ل وه‌رپرسه‌يل له حكومه‌ت ناوه‌ندى.
جى باسه، بريار بوێ ئمڕوو چوارشه‌ممه هه‌ردوگ مه‌كته‌ب سياسى پارتى و يه‌كێتى له شار هه‌ولێر دانيشتنيگ ئه‌نجام بيه‌ن ئه‌را گفتگوو له‌باره‌ى دويايين رويداگه‌يل ك كه‌فته‌و له ناوچه‌ى زينى وه‌رتێ.
