شار سلێمانی یەک هەفتە بی ئاوە

شەفەق نیوز/ بوری ئاو سەرەکی شار سلێمانی، ئمڕوو سێشەممە، وەناکاوەو شکیا، ک ئاو خواردن لە شارەگە بڕی.
ئامانج جەلال قسەکەر وەناو فەرمانگەی مەجاری لە سلێمانی ئەرا ئاژانس شەفەق نیوز وت: بوریە سەرەکیەگە ک ئاو خواردن دەێدە سلێمانی، وەرجە کەمیگ شکیا، و نێزانیمن هووکارەگەی چەبوی.
وتیش؛ تیمە تایبەتەگان کارکەن ئەرا خاسەوکردنی، بەڵکم ئاوەگە چیە ناو ژوور بوریەگان، ک کار وەزوی خاسەوکردنی سەختەو کرد، و ئاماژەدا: یەک هەفتە خوازیمن ئەرا خاسەوکردنی.
جەلال وتیش؛ بوریە سەرەکیەگە هالە ویستگەی ئاو سەرچنار، وداوا لە خەڵک شارەگە کرد مقیەتی ئاوەلیان بکەن تا ئەوەنە بوریەگە خاسەوکریەێد.