پێشەنگای ناودەوڵەتی سلێمانی ئەرا کتاو سوو چوارشەممە دەسکەێدەپی
شەفەق نیوز/ سەرپەرشتیارەیل پێشنەگانی ناودەوڵەتی کتاو لە سلێمانی، راگەیانن سوو چوارشەممە دەسکردن وە پێشەنگاگە، وە بەشداری فراوانیگ لە ماڵەیل چابکردن و بڵاوکردن ناوخۆیی و بیگانە.
یاسین ڕەحیم فەرەج یەکەم جیگر سەرۆک ژوور بازرگانی و پیشەسازی سلێمانی، لە کۆنگرەیگ رۆژنامەوانی وەگەرد شەوقی عومەر مەحمود وەڕێۆبەر پەیوەندیەگان و بازاڕکردن پێشەنگاگە، ئمڕوو وت: گریەبەسی وەگەرد کۆمپانیای «ئەتڵەس ئەسیل» دیرن ک چالاکیەیل پێشەنگاگە رێکخەێد.
و ئاماژە کرد ک پێشەنگاگە ئەوەسا بوودە مەنبەریگ ئەرا گشت نووسەر و رووشنهویرەیل هەرێم کوردستان و عراق ئەرا هەل کردن بەرهەمەیلیان، و بوودە شوونیگ ئەرا گواستنەوەی هویر وەگەرد بیگانەگان.
لەلای خوەییش فەرەج لە کۆنگرەگە وت: پێشەنگای ناودەوڵەتی سلێمانی تەقەلا ئەرا دەسکردنی وە دوویەم خولەگەی کرد، و ئاماژە کرد لە بەشداربوین ماڵەیل بڵاوکردن و چابکردن لە دەوڵەتە هاوساگان و لە گشت جەمسەرەیل جهان و چوار بەش کوردستان گەورا.
وتیش؛ ئی کارە ئەرا سلێمانی گرنگە نەگ تەنیا لەلایەن بڵاوکرن کتاوەگان، بەڵکم بازاڕ پارێزگاگە جوولنێد، چوونکە پێشەنگاگە پێشوازی لە دەیان هەزار لە ناوخۆ و هەزاران لە دەیشتەو کەێد.
پێشەنگاگە لە خول دوویەمی لە ساڵیاد دامەزرانن پایتەخت رووشنهویری لە هەرێم کوردستان دەسکەێدەپی.
لە ساڵ گوزەیشتە پێشەنگاگە لە چاپ یەکەمی لە خود مەوقەگە دەسکردەپی وە بەشداربوین زیاتر لە ٣٠٠ ماڵ چاب وبڵاوکردن ناوخۆیی و بیگانە، و وهەلکردن هەزاران ناونشانەیل لە کتاو و تۆێژینەوەگان.
