سوو چوارشەممە.. خۆپیشاندانیگ تەنیا ئەرا ژنەیل لە شوونیگ ئاشکرا نەکریاگ لە سلێمانی
شەفەق نیوز/ رێکخراو (دەسەی ژنە ناڕەزاگان لە سلێمانی) راگەیان دەسکردن وە خۆپیشاندانیگ ئەرا ژن تەنیا، وەبی ئاشکراکردن شوون خۆپیشاندانەگە.
شنە عەلی سەرپەرشتیار خۆپیشاندانەگە ئەرا ئاژانس شەفەق نیوز وت: خۆپیشاندانەگە سوو چوارشەممە ساعەت ١٠ی شەوەکی دەس کەێدە پی، وەبی باس شوونەگە تا لایەنە ئەمنیەگان قەیەغەی نەکەن، و ئاماژە کرد ک وەرجە خۆپیشاندانەگە وە کەمیگ شوونەگەی ئاشکرا کریەێد.
و ئاماژە کرد ک خۆپیشاندانەگە ئەوەسا وەبەشداربوین فەرمانبەرەگان و ماموستاگان تەنیا لە ژنەگان بوود، لەوەر ئەو پەیماننامەیلە ک پیاوەگان واژوویان کردن وە مەرج دەرنەچگیان وە هیچ خۆپیشاندانیگ لە ئایندە وەرانەوەر مەرەقەزکردنیان.
شنە عەلی دووپات کرد ک مەوقەی خۆپیشاندانەگە لە دویای بڕیار حکومەت هەرێم هات لە دەسکردن وە دەوام مەکتەوەگان لە ١٧ی ئی مانگە، و پرسیار کرد؛ ئایا چوین ماموستا وەبی وەرگردن مافەیلی وەتەواوی بچوودە مەکتەو؟.
وتیش؛ ئەوەسا بویمنە خاوەن یەک هەڵوێست دەربارەی دەوام یا نادەوام ئەگەر حکومەت بڕیار دەوامکردن دا.
هەمیش داوای خەرجکردن مووچەگان ئمساڵ وە تەواوی کرد وەبی بڕین بەشیگ لەلی، و نەوودە جوور مانگەیل گوزەیشتە ک دیرکەفتن و لەلیان بڕیا، چوونکە ئەو رەوشەیل سەختە ک فەرمانبەرەگان وەخوەیان دوینن کەوران، و وتیش؛ ژیانەگە بویە دووزەقیگ ئەرا ئیمە.
