سلێمانى.. هاووڵاتييگ وه‌ناو عه‌مره‌كردن ده‌يان كه‌س خه‌ڵه‌تنێد
شه‌فه‌ق نيوز/ كه‌سيگ وه‌ناو(و. ك)له خه‌ڵك شار كه‌ركوك و نيشته‌جێ قه‌زاى رانيه له پارێزگاى سلێمانى له هه‌رێم كوردستان، له‌ماوه‌ى گوزه‌يشت وه‌ناو گه‌شت عه‌مره‌و كه‌عبه‌ى پيرووز ئه‌را هاووڵاتيه‌يل، پويل له ده‌يان كه‌س وه‌رگرتگه‌و ئيسه‌يش خوه‌ى شارده‌سه‌وه‌و چيه وه‌ره‌و شوونيگ ناديار دوياى ئه‌وه‌گ واده‌ى گه‌شته‌يليان وه‌سه‌ر چيه.
بڕيگ له‌و كه‌سه‌يله ك پويل و پاسه‌پۆرته‌يليان دانه‌سه ئه‌و كه‌س ناوبرياگه، شكايه‌ت له‌لاى پۆليس تۆمار كردنه دوياى وه‌سه‌رچگن واده‌ى گه‌شت وه‌ره‌و سعوديه له‌وه‌ر ئه‌نجامداين عه‌مره.
له‌ى باوه‌تيشه‌و،شۆڕش ئسماعيل قسه‌كه‌ر وه‌ناو پۆليس راپه‌ڕين(رانيه) له لێدوانيگ رووژنامه‌گه‌رى وت: شماره‌يگ له هاووڵاتيه‌يل شكايه‌ت له‌لاى پۆليس تۆمار كردنه له‌و باوه‌ته‌وه‌و پۆليس دوسيه‌يگ په‌يجوورى وازكردگه‌و ده‌سكرده‌سه چه‌وديريكردن و باس له‌وه‌يش كرد ئه‌و كابرا هويچ كۆمپانيا يا دوكانيگ فه‌رمى وه‌ناو گه‌شت حه‌ج و عومره نه‌يرێد.
