سلێمانی.. کوشیان پیاییگ وەدەس کوڕەگەی و مردن ژنیگ بوخت سزاننی کردیەسە شویەگەی
سەرکەوت ئەحمەد قسەکەر وەڕیەوبەرایەتی پولیس سلێمانی ئەرا ئاژانس شەفەق نیوز وت: نیمەڕو ئمڕوو ئاگادار کریایمن وە کوشتن پیاییگ وەدەس کوڕەگەی لەناو یەکیگ لە گەڕەکەیل سلێمانی.
وتیش: مەفرەزەیل پولیس روی وەرەو شوین رویداوەگە کردن ئەرا جیوەجیکردن ریکارەیل یاسایی و دەسگیرکردن توومەتبار.
هەرلیوا، ئمڕوو چوارشەممە، ئەو ژنە گیانی لەدەسدا کە توومەتبار شویەگەی کرد کە ئاگر وەرداسە لەشی، ئەوەیش دویای چەن رووژیگ لە خەفتنی لەناو خەسەخانە، لەوەر سزیانی.
"ئاڤان جەزا جەوهەر" لە تەمەن 17 ساڵان لەوەر سزیانی گیانی لەدەسدا، کە سزیانەگەی وە زیاتر لە 80 لەسەد لە لەشی مەزەنە کریەێد.
وەرجە چەن رووژیگ، پیاییگ ئاگر ژن زگپڕی لەناو حەمام ماڵەگەی دا، ئەوەیش لە شار سلێمانی، وەگورەی زانیاریەیلیگ وەلایەن باوگ ژنەگە وەناو جەزا جەوهەر، کە ئەرا بڕیگ میدیا باس کرد کە زاواگەی سزانیەسەی چوینکە رازی نەویە ژنیگ ترەک لەبانی بارێد.
ژنەگە ئەرا میدیایل وت: شویەگەی نەفت رەشانیەسە بانی لەناو حەمام و ئاگری داگە.
وتیش: شویەگەی ئی کارە کردگە چوینکە ئارەزوو داشتگە ژنیگ ترەک بارێد، وەلێ من رازی نەوینە.
ئەو ژنە کە تەمەنی لە ٢٠ ساڵان ئەوبان نەکردگە، لفانگ لە زگی بویە هەناێ سزیاس.
لەلای خوەیانیش کەسوکارەیل شویەگە وتن گشت ئەو توومەتەیلە راس نیین، و ژنەگە وەدەس خوەی خوەی سزانیە.
