سلێمانی وەرجە جەژن هووشداری لە بەرزەوبوین تووشهاتنەیل کۆڕۆنا کەێد
شەفەق نیوز/ عەبدولڵا سەنگاوی جیگر وەڕێۆبەر تەندروسی سلێمانی، ئمڕوو دووشەممە، دووپات کرد ک ئەوەسا سلێمانی بەرزەوبوین فرەیگ لە تووشهاتنەیل کۆڕۆنا وەخوەی دوینێد.
سەنگاوی ئەرا ئاژانس شەفەق نیوز وت: تووشهاتنەیل ڤایڕۆس کۆڕۆنا لە شار سلێمانی هانە زیایبوین و خەسەخانەیل دیرن پڕەو بوون، و بایەتە هاووڵاتییەیل پابەند وە رینمایل تەندروسی بوون و نەچنە ناو قەرەباڵغی.
وتیش؛ وەرگردن واکسینەگە گرنگە تا تووش ڤایڕۆسەگە نان، وتیش؛ جەژنەگە نزیکە و بایەتە پابەندی وە رینمایل وەزارەت تەندروسی هەرێم کوردستان لە ڕووژەیل جەژن بوود، وەتایبەت ک بڕەیل فرەیگ لە گەشتیارەیل وەرەو شارەگە روی کەن.
لەلای خوەییش سامان شێخ لەتیف وەڕێۆبەر راگەیانن تەندروسی سلێمانی ئەرا ئاژانس شەفەق نیوز وت: تووشهاتنەیل ڤایڕۆس کۆڕۆنا لە شارەگە بەرزەو بوین، ک خەسەخانەیلە لە ماوەی ٢٤ ساعەت گوزەیشتە ١٣١ تووشهاتگ وەرگردن، لەلیان ١٢١ کەس هانە ژوور ئۆکسجین، و ٧ مردن تۆمار کریا.
لەتیف وتیش؛ تکا لە هاوڵاتییەیل و گەشتیارەیل کەم ک وەرەو شارەگە تیەن پابەند بوون وە رینمایل تەندروسی ئەرا مقەیەتیکردن خوەیان.
