سلێمانی لە رووژ جەژن بوژانەوەی گەشتیاری وە خوەی دونێد…وینە
گەشتیار ئەحمەد وە ئاژانس شەفەق نیوز وت، " هووکار راسی هاتم ئەرا هاوینەهەوارەیل و تاقگەیل و درەختەیلیە ک خولیای وینەگردنیان دیرم، لە گشت وچانیگ وەگەرد خێزانەگەم ئەرا کوردستان تیەیمن و وەگەرد خوەم کامیرا تیەرم تەقەڵای وینەگردن شوینەیل رەنگین و مەرد دەم".
وتیش" فرەگ لە هاوارەیل وینەگرە عەرەبەیل و بیانەیلم ک تا ئیسە سەردان کوردستان نەکردنە هەنای نووڕنە وینەیلم ئەڵاجیویان تێد وە جوانی سروشت هاوینەهەوارەیل هسلێد هویرەو بکەن لەوەگ سەردان کوردستان بکەن چێژ لە سروشتی وەربگرن".
بوژانەوەی کار چێشتخانەیل
چێشتخانە و کافتریاگان سلێمانی لەماوەی جەژن فرە قەڵەباڵغن، وە تایبەت وەگەرد ئەوەگ بڕیگیان لە کار وسیاوین، پاسەیل گەشتیاری وە کوومە نوای چێشتخانەیل بەسانە، و ئەرا گەشتیارەیلیان مینەی خواردنەی خوەرهەڵاتی تایبەت وە مەرد عراق کەن.
یەکیگ لە خاوەن چێشتخانەیل وە پەیامنێر ئاژانس شەفەق نیوز وت،" عراقیەیل میلەتیگن خوەشیان وە گشت جویرە خواردنیگ تیەد هەرکە تیەن ئەرا شوینەیل گەشتیاری وە تایبەت ناوچەیل کویەیلە وە خێرایی هەس وە ورسگی کەن فرەیگ داوەی خواردن دیاریکریاگ کەن جویر کەباب و تکە و ماسی وەبان زوخاڵ، و هەنای لە نووشینەیل پرسیار لەلیان کەیمن داوای نووشینەیل گازی کەن باوجی فرەیگیشیان داوای دوو کوردی کەن لەدویای خواردنەگەیان خێرا داوای نووشین چای بان زوخاڵ کەن ئەرا تەواکردن وچانەگەیان.
وتیش" بڕیگ لە سەردان کەرەیل چێشتخانەگە رخیان چوود لە پاکی شوینەگە و جویر خواردنەگە باوجی لە دویای سەردان یەکەمیان دڵنیایەوبوین لەبان پاکی چێشتخانە و گشت چشتەیلی وە چەو خوەیان پاکی قاو و خواردنەیل و لیوان دوین وەگەرد بەرزی کوالێتی جویر ماسی و گوشت ک پیشکەش وە میوانەیل کریەد، چوینکە ناوبانگی چێشتخانە راستەوخۆ کاردانەوە دروسکەێد لەبان ناوبانگ گەشیاری لە کوردستان.
عەباس حەسەن رەسام گەشتیاریگە لەپارێزگای واست هاتیە" هاوڵاتیەیل کوردستان میواندووسن ، یە یەکەم جارمە وەگەرد خێزانەگەم سەردان هەرێم بکەم رخم چی لەوەگ چوین لەیەک بڕەسین چوینکە هویچ چشتیگ لە زوان کوردی نیەزانم باوجی ئیرنگە هەس کەم هامە ناو ماڵ خوەم لەمابەین کەسوکار و هاوڕیەیلم گشتیان و دەسمیەتیمان دەن و شوینەیل گەشتیاری نیشانمان دەن".
وتیش" بڕیگ لە هاوڵاتی ئاوایەیل نان پیشکەشمان کەن وەگەرد میوە و دوو خوەشیگ خەنن و ئویشن " فەرموو مامە" تەقەلای فرەیگ دام ئەرا هوکارە بوین وشەی زۆر سوپاس باوجی جویر پێویست نییە ئەرا سووپاسگوزاریکردنیان و ئەرا ئەو پیشوازیکردن و میوان دوسییان.
قسەکەر وەڕێەوبەرایەتی گەشتوگوزار سلێمانی لە وەرین لە بەیاننامایگ راگەیان، گشت ناوچە و شوینەیل گەشتیاری و چێشتخانە و کافتریاگان وازن لەوەردەم گەشتیارەیل لەماوەی سێ رووژ جەژن، دووپاتکرد" دەرفەت دریاس وە وازکردن گشت دوکان و شوینەیل گەشتیاری لەماوەی مانگ رەمەزان وە روی گەشتیار و سەردانکەرەیل، تا ئامادەبوود ئەرا پیشوازیکردن لە گەشتیار لەماوەی رووژەیل جەژن رەمەزان.
وتیش، " زیاتر لە 172 هەزار گەشتیار سەردان شار سلێمانی کردنە لەماوەی رووژەیل جەژن رەمەزان گوزەشتە، باوجی چەوەڕێ شماری فرەتریگین ئەرا ئمساڵ.
پەیامنێر ئاژانس شەفەق نیوز وت" نزیکەی 60 هەزار گەشتیار لەماوەی یەکەم و دویەم رووژ جەژن سەردان سلێمانی کردنە نزیکەی (4500) گەشتیار لە ناوڕاس و باشوور عراق ه ئەرا ئیدارەی گەرمیان توومارکریاس و نزیکەی (170) گەشتیار ئیرانی لەڕی دەروازی پەرویزخان هاتنە.
