سلێمانی.. گەردینیگ لە ناو گوزەیشتە
شەفەق نیوز/ «نابونید» شاه بابل لە سەدەی شەشەم وەرجە زایی، خوەی یەکەم کەس بوی ئەنتیکە و ئاسەواریەگان و چشتە کۆنەگان گردەو کردیاد، و لە دوو ئەفسانە نەمرەگان «ئەلیادە» و «ئۆدوسیا» ئەرا «هومیرۆس» شاعر ئەغریق، ک خوەی سەرەتای گرنگی داین وە ئاسەواری بوی، ک لەناویان باس جیماگە ئاسەواریەگان کریاگە.
قەیسەر «یولیۆس» هەمیش خوەشی لە گردەوکردن چشتە کۆنەگان هاتگە، و ئووشن خوەی یەکەم کەس بویە مۆزەخانایگ ئەرا ئەندازیاری بیناسازی دروس کردگە.
ئی چشتەیل کۆنە گردەو کریەن، یا لەوەر کۆنەیی سەردەمەگەی، یا لەوەر رەنگینی شیوەگەەی، یا چوونکە بینەزیرە، یا سوودیگ لەلی هەس، یا خاوەن هەستیگ دەروینی وەگەرد کەسەگە بوود، یا جیوازیەیلیگ تر.
رەدبوین ١٠٠ ساڵ لەلای کەمەو لەبان ئەو چشتە، خوەی مەرج ئەوەسە ک وە ئەنتیکە بناسریەێد، جوور جیماگەیل ئایمەگان لە کانزا یا تڵا یا چوو دروسکریاگ یا هەرچشتیگ شیوەی خوەی لە سەردمیگ کۆنە گردگە.
دوکانەیل ئەنتیکە فرووشتن لە هەرێم کوردستان، لەی ماوەیل دویایینە جوولەیگ بازرگانی وەخوەیان دوێنن، ک لە خود وەختەگە خوەی سیمای مەدەنی و شارستانی و کەلتووری و بازرگانیە.
شوان محمود خاوەن دوکان ئەنتیکە فرووشتنە لە جادەی مەولەوی لە شار سلێمانی، ئەرا ئاژانس شەفەق نیوز ئووشێد: لە سەرەتاوە کار لە تابلۆ روینیەگان و دەسرگڕەنگینەگان کردیام، دویای دەرچگنم وەرەو دەیشت وڵاتەگە بازاڕەیل ئەنتیکە فرووشەگان لە شارەیلیگ دیم ک باس لە مێژوو ئەو وڵاتە کەن، منیش کارگەم ئاڵشت بوی.
شوان محمود هەمیش وت؛ لەوەخت هاتنەوەم هویرەو کردم دوکانەگەم بکەمە ئەنتیکە فرووشتن ، و لە دە ساڵ وەرجە ئمڕوو دەسکردمە ئەی کارە، و ئیسە من خوەشحاڵم ک ئەو ئەنتیکە و چشتەیل کۆنە لە دوکانەگەم زنیەو بکەم.
و ئووشێد: ئیسە مەردم مینەی گوزەیشتە کەن تا لە سویکیگ لەناو ماڵەگەی هەناسەی کەشەوهەوای سەردەمە دویرەگان بکیشێد.
و هەمیش ئووشێد؛ دووسیم ئەرا کارەگەم بویە بنەمایەی وەردەوامی.
لە باوەت پشتگیریکردن حکومەتی یا دامەزراوەیل رووشنهویری وە خەفەتیگەو ئووشێد: هیچ دامەزراویگ رووشنهویری یا حکومەتی سەردانم نەکردگە، هەرچەن فەرمانگەی ئاسەواری و ئەنتیکەگان هەس، بەڵکم ئیسە وەپشتگوشخستن و خەمسەردی خوەی باوە.
