سلێمانی ئاهەنگ وە رووژ جەهانی چارەسەری سروشتی کەێد
نوێنەر پزیشکەیل فیزیۆتێراپی لە سەندیکای کرێکارەیل سلێمانی، ئەیوب عەبد الواحد حەمەئەمین، ئەرا ئاژانس شەفەق نیوز وت: ئاهەنگ وەبوونەی رووژ جەهانی چارەسەری فیزیۆتێراپی لە ٨ ئەیلول گشت ساڵیگ ئەرا هووشیارکردن خەڵکە لەباوت سوودەیل چارەسەری سروشتی لە خاسترکردن کوالێتی ژیان ئەرا تاکەیل لە گشت جەهان.
وتیش؛ ئمڕوو ڕێز لە شمارەیگ کرێکار ئەو بوارە گریا، جویر پیزانینیگ ئەرا تەقەلایل مرۆیی لە خاسترکردن رەوش بیمارەیل.
هەمیش وت: ئاهەنگ ئی رووژە وە هاوکاری ناوەین سەندیکای کرێکارەیل و وەڕێوبەرایەتی تەندروسی قایمقامیەت سلێمانی هاتیە، و ئاهەنگەگەیش دویاخریا ئەرا ئمڕوو شەممە، چوینکە ڕووژ هەشتەم ئەیلول ئەمساڵ جمعە بوی، ئەراوە دویاخریا ئەرا ئمڕوو.
لەباوەت گرنگی چارەسەری فیزیۆتێراپی، ئەیوب زوور لە توانای چارەسەرکردن بڕیگ باوەت تەندروسی فراوان کرد، وەو شیوە کە ئەرکیگ چارەنویسساز گریەێد ئەرا ئەو بیمارەیلە لە زەخمداری یا نەشتەرگەری خاسەو بوون، هەرلیوا رییگ نا نەشتەرگەری ئەرا کەمکردن ئازارەیل دابین کەێد، هەرلیوا دەسمیەتیدەرە لە وەڕێوەبردن نیشانەیل و خاسترکردن کوالیتی ژیان ئەرا ئەو بیمارەیلە کە وەدەس بیماری ناڵن، و ببماریە درویژمازەیل جویر هەوکردنی جومگەگان، شەکرە و بیماریەیل دڵ، وتیش؛ مەودای چارەسەری فیزیایی فراوانە و توەنێد سوود ئەرا کەسەیل گشت تەمەن بڕەسنێد.
کۆنفیدراسیۆن جهانی چارەسەری فیزیۆتێراپی (WCPT) رووژ جەهانی چارەسەری سروشتی لە ٨ ئەیلول ساڵ ١٩٩٦ دامەزران، وە ئامانج ناسانن ئەو بەشداریەیلە کە چارەسەرکەرەیل فیزیایی ئەرا بیمارەیل و کۆمەڵگا کەن.
