40 ساڵ لەبان "جینۆساید بارزانییەیل".. سەرۆکایەتی هەرێم وە "دڵ سزیای" یادی کەێد
سەرۆک هەرێم کوردستان، نێچیروان بارزانی، وت: "ئمڕوو وە ڕێزەو یاد چلەمین ساڵیاد ئەنفالکردن و سەرنقومکردن هەشت هەزار ناخاڵە و گەنج و پیاو و شێخ بارزانی لە ئاوێتە زوورەملیەیل کەیمن یاد، کە لە کۆتایی مانگ تەمووز تا ناوڕاس ئاب ساڵ 1983 بوینە قوربانی تاوانیگ دڕندانە و هەڵمەتیگ دەسگیرکردن ئارەزوومەنانە کە لەلایەن دەسەڵاتدارەیل عراق ئەنجامدریا لەو مەوقە کە بردەیان تا دی هەرگیز گلەو نەخوەن، هەزاران لە خیزانە بیدەسەڵاتەیل بارزانی لە ئاوێتەی قوشتەپە و بەحرەکە و هەریر و سۆران و ناوچەیلتر بی باوگ و برا، و هەزاران ژن بارزانی پاک بی شوی مەننەو، و ناچار بوین وە تەنیا بکەفنە روی چارەنویسیگ نادیار و سەخت و بیبەشی، و لەوەردەم دەیان جویر لە ئازار وسیان.
هەمیش وت ئەو ژنەیلە بوینە باوگ ئەرا دەرکردن تیکەنان مناڵەیلیان، و ئیوەتیان کردن، و تویش چەنها ئازار و ناخوەشی بوین، وەرانەوەر بیبەشی و نەداری و تەنیایی وسیان، و وە هەس بەرزیگ کەفتنە روی ژیان و توەنستن وە شیوەیگ شایستە نەوەیگ نیشتمانپەروەر و پارێزەر پەروەردە بکەن، من یەک وە یەک دەس ئی داڵگە میهرەبان و دڵسووزەیلە ماچ کەم.
سەرۆک هەرێم کوردستان وتیش: ئەنفالکردن بارزانییەیل هەکاتی ئەو تاوانانەیلتر کە لەبان خەڵک کوردستان ئەنجامدریانە، نەویە مدوو داوەزیاخن هاز و حەماسەت گەلەگەمان لە نواوسیان نادادپەروەری و دیکتاتۆرییەت، بەڵکم وەپیچەوانەی ئەوە بوی، هەس رویوەڕوین و و ئیرادەی سەرکەفتن و ئازادی ئەرا گشت خەڵک کوردستان زیای کرد ئەرا درویژەدان وە خەبات بە باوەڕیگ پتەوتر.
بارزانی لە قسەیلی وتیش: لەی یادە سڵاو ئەرا ئەنفالکریایل و گشت شەهیدەیل کوردستان کل کەیمن، هەرلیوا سەر ڕێزگرتن ئەرا گیان پاکیان چەمنیمن، سڵاو و سوپاس و پێزانین خوەمان ئەرا گشت خەڵک بەخشندەی هەولێر و دەورگردی، و لە هەریر، بەتاس، سۆران، و لە هەر شوینیگ بوون، کە وە هانای بنەماڵەی ئەنفال بارزانییەوە رەسینە و شوینیان کردنەسەو، وە لەی یادەیش وە هەمان شیوە، و لە وەختیگ هەرێم کوردستان وە بارودۆخیگ هەستیار و رەد بوود، جەخت لەبان یەکڕزی و تەبایی و یەکگرتگی ناوەین گشت لایەن و پێکاتەیل کوردستان کەیمنر کە یە تاکە رییە ئەرا شکۆمەنی و سەرکەفتنمان.
