"سەوەتەی خوەراک ئەرا عراق".. هەرێم کوردستان نزیکەی 300 هەزار تەن میوە بەرهەم کەێد
شەفەق نیوز/ بێگەرد تاڵەبانی خانمە وەزیر کشتوکاڵی و داهاتەیل ئاوی لە هەرێم کوردستان، ئمڕوو چوارشەممە، وت: هەرێم کوردستان ناوچەیگ گرنگە لە چین کشتوکاڵی، و وە سەوەتی خوەراک ئەرا گشت عراق دانریەێد، و دووپات کرد کە هەرێم کوردستان لەوەر سروشت جوگرافیایی، بویەیسە سەرچەوەیگ ئەرا دابینکردن ئاو ئەرا ئەو بەشەیل وڵات.
ئەوەیش لە وتاریگ لە چوارچێوەی چالاکیەیل رووژ دویەم لە کۆڕبەند ئابووری ناوەین ئیتالیا و هەرێم کوردستان، کە لە بارەگای یەکێتی گشتی پیشەسازی ئیتالیا وەڕیەو چوود.
تاڵەبانی لە وتارەگەی وتیش: هەرێم کوردستان زەوییگ تەخت دیرێد ئەرا کشتوکاڵی، و هاناو سەوەتەیل خوەراک ناوچەگە.
وتیش: حکومەت کوردستان گامەیلیگ جددی برد لە نووڕین وەدەسهاوردن ئاسایش خوەراک ئەرا هەرێم کوردستان و ئەو ناوچەیل عراق، دووپاتیش کرد کە ئاڵشتبوین کەشوهەوا کاریگەری لەبان دەوڵەت ناوچەگە داشت و هەمیشە لەبان عراق.
تاڵەبانی وتیش: هەرێم کەفێدە بەش باکوور عراق، مە ناوچەیگ ئارامە، لە خود وەختەگە بڕیگ تایبەتەمنی دیرێد لە ناوچەیل ناوڕاس و باشوور عراق جیاوازی کەێد.
وتیش: هەرێم کوردستان هەفت ملیۆن دۆنم زەوی کشتوکاڵی دیرێد، و نزیکەی سێ ملیۆن دار دارستانەیل.
هەمیش وت: پەنج پەل سەرەکی ئەرا سەرچەوەیل ئاو دیریمن، و برهەمکردن سەوزە و میوە وەشیوەی خاسیگ لە هەرێم وەڕیەو چوود، ساڵانە بڕ بەرهەم رەسێدە 250-300 تەن لە میوە.
