١٢٠٠ کەس لەبانی بوینەسە قوربانی..وسیانیگ ناڕەزایی ئەرا قورتاربوین لە ری مەرگ ناوبەین کەلار و خانەقین
شەفەق نیوز/ شمارەیگ لە چالاکوانەیل مەدەنی لە خانەقین، ئمڕوو سێشەممە، وسیانیگ ناڕەزایی وەداوای تەواوکردن ری دویەم لە ری خانەقین وەرەو کەلار و سلێمانی ڕێک خستن، ئەرا قورتاربوین لەو زنجیرەی مردن رووژانە.
حەمزە دەلو یەکیگ لە ناڕەزایلە ئەرا ئاژانس شەفەق نیوز وت: ئمڕوو وسیانیگ ناڕەزایی لەبان ری ناوبەین خانەقین و کەلار ڕێک خستیمن، ک وە ریکردن وەپا لەبان ئی ریە دەسوەپی کرد، ئەرا داواکردن لە حکومەتەیل هەرێم کوردستان و فیدراڵی وە تەواکردن ری دویەم لە ری کەلار – سلێمانی، و خاسەوکردن ئەو شوینەیل بەدە لەناوی، و دیاری کرد ک یە ٥ ساڵە کارکردن لەی ریە وسیایە.
دەلو دووپات کرد ک ئی ریە ک وە فاقەیل مەرگ ناسریاگە، گیان ٧٥٠ کەس درەو کرد و ٤٥٠ کەسیش زەخمدار کردیە لە ساڵەیل گوزەشتە، و گرنگی لە تەواوکردن ری دوو سایدی هەس، ئەرا کۆتاییهاوردن وە کارەساتەیل مرۆیی مەرگبار رووژانە.
پەیامنێر ئاژانس شەفەق نيوز وت : ئەو ریۆیوان ناڕەزاییە ئەرا هاوکاری وەرد چالاکوانەیل کەلار هات ک چادرەیلیان لەوەردەم نویسینگەی پەرلەمان کوردستان لە سلێمانی هەڵدانە وەداوای دووسایدکردن ری کەلار – خانەقین.
