سەیرانگەیل کوردستان پەنای بیوەین ئەرا خەڵک ناوڕاس و باشوور عراق لە گەرمی تاوسان.. وینە
ئەمیر فورات (گەشتیاریگ خەڵک پارێزگای دیالە) ئەرا ئاژانس شەفەق نیوز وت: وەگەرد هاوڕێەیلی هاتیەسە تاوسانهەواری (کونە ماسی) تا گەرمای سویەر تاوسان لە دیالە قورتار بوود، وتیش: "کەشوهەوای تاوسانهەواری فرە خوەشە، و شوینیگ گونجیاگە ئەرا خوەشگوزەرانی لە دیمەنە رەنگینەیل، کە ئاو و کویە و بڕیگ شوین گەشتیاری لێرا هەس.
وتیش: "سەردان سەیرانگەیل دوکان و کویەی ئەزمەر کردیمن، و تا جەژنیش لە کونەماسی مینیمن تا فرەی تاوسانەگە لە شوینە رەنگینیەیل هەرێم کوردستان وەسەر بوەیمن.
لەلای خوەییش، ساجدین محمد، ( خانمە خوەنەوار زانکۆ و خەڵک بەغدا)، لە قسەیلی ئەرا ئاژانسمان وت: دویای تەواوبوین تاقیکردنەوەی ساڵانە، بڕیار دامە لە ناڕەحەتیەیل رووژەیل گوزەشتە سەرفەراز بووم، لێرا لە هەرێم کوردستان، کوخەیل تاوسانی رەنگینن، دیمەنەیل سەرسڕکەرن، پلەی گەرمایش فرە نزمترە لە بەغدا، هەر گلەیگ وەگەرد خیزانەگەم ئەرا یەکیگ لە سەیرانگەیل هەرێم تیەیمن.
محمد ئەحمەد (گەشتیارسگ خەڵک بەغدا) وت؛ کەشوهەواگە لە "کونە ماسی" رەنگینە، شوینەگە خیزانییە و چەن شوینیگ گەشتیاری هاناوی، و بازاڕیش ئەرا سەنین چشتەیل گەشتیاری ها ناوی کە تەنیا لە هەرێم کوردستان پەیای کەێ.
جموجویل گەشتیاری لە سەیرانگەیل هەرێم کوردستان تەنانەت لە وەرز زمسانیش وە گورجی مینێد، وەتایبەتی دویای نووکردن شوینەیل گەشتیاریی لەبان کویە بەرزەیل کە بڕیگیان وە درویژی سێ وەرز بی وەفر نیین، بیجگە لە بویین سەدان شوین گەشتیاری تاوسانی.
حەسەنین عەبود (گەشتیاریگ پارێزگای نەینەوا) ئەرا ئاژانس شەفەق نیوز وت: "شوینە گەشتیارییەیل سلێمانی فرە فرەن، تەنانەت لە وەرز زمسانیش گەشتوگوزاری زمسانە هەس کە وەفر لە سێ وەرز لەبان کویەیل وارێد.
حەسەنین تەقەلایل ئیدارەی سلێمانی بەرز نرخان ئەرا گەشەکردن جویلەی گەشتیاری لە پارێزگاگە، کە رەنگدانەوەی خاسیگ گلەو خوەێد نەک تەنیا ئەرا خەڵگ سلێمانی، بەڵکم ئەرا گشت هاوڵاتیەیل عراق.
لەلای خوەییش، ئەو گەشتیارە، جومعە نعمەت، لە قسەیلی ئەرا ئاژانس شەفەق نیوز باس پیشوازی خاس خەڵک سلێمانی و دامودەزگا ئەمنییەیل و گشت دوکانەیل، ئەرا پیشوازی و رەفتار خاس و ئەرا ئەو هاوکارییەیلە ک پیشکەش وە گەشتیارەیل کەن و دەسخوەشی لەلی کرد، ک یەکەمجارە هاتنەسە شار سلێمانی، و ئەرا ئی سەیرانگا.
تاوسانهەواری کونه ماسی کەفێدە 56 کم وەرەو باکوور خوەرھەڵات سلێمانی و 30 کم لە باشوور دەڤەر ماوەت، دەوڵەمەنە وە سەرچەوە ئاوییەیل و چواردەوری بەرزایی و دارە، یەیش هوکاریگ گرنگە ئەرا هاتن فرەیگ لە گەشتیارەیل.
