سەرۆک هەرێم کوردستان پیشوازی لە پەسەنکردن بودجە کەێد و خەفەت رەفتارەیلیگ نادروس خوەێد
سەرۆک نێچیروان بارزانی لە بەیاننامەیگ وت: پیشوازی لە پەسەنکردن بودجەی سێیانی فیدڕاڵی عراق کەیمن، و ئومید خوازیمن بوودە نەخشە ری نوویگ ئەرا پیشکەفتن ئابووری و ئارامی سیاسی و زەمینەیگ گونجیاگ ئەرا بەرهەمهاوردن بسازێد، دەسخوەشی لە گشت ئەو بەڕێزەیلە کەیمن ک وە دڵسووزی ئەرا بەرژەوەنی هاووڵاتیەیل و یەکسانی ناوەین کەسەیل گەل عراق کار کردن.
وتیش؛ وەداخەو گفتوگۆەیل ئەنجومەن نوینەرەیل رەفتارەیلیگ نادروس وەرانەوەر مافەیل هەرێم کوردستان و ناوچە دابڕیاگەیل وەلایەن بەشیگ لە پەرلەمانتارەیل وەخوەی دی، و ئەوەیش وەگەرد بنەمای رێککەفتن سیاسی هاوپەیمان وەڕیەوبردن دەوڵەتەگە نەگونجایاگە، و ئی نووڕین و شیوەی رەفتارکردنە خزمەت کار سیاسی و رەوشەیل و بانان عراق نیەکەێد.
بارزانی وتیش: بایەسە یاسای بودجەی گشتی وەشیوەیگ یەکسانی وەگەرد چەودیاریکردن هەرێم کوردستان جویر پیکاتەیگ سیاسی دەستووری جیوەجی بکریەێد، و هەمیش ناوچە دابڕیاگەیل و یەرژەوەنیەیلی.
وتیش؛ بایەسە گەرەنتی تەواویگ بوود ک شایستەیل دارایی و مووچەی خاوەن مووچەیل لە هەرێم کوردستان ریگری نەکفێدە نوای و لەوەر هوکارەیلیگ سیاسی نەکەفێدە پشتکووش.
سەرۆک هەرێم کوردستان وتیش: ئەوەگ لە گفتوگۆەیل بودجەی گشتی دیمنەی، جی نیگەرانی قویلە، و جاریگتر ئی راسیە چەسپان ک پارچەبوین لایەنەیل کوردستانی زەرەد وە هەرێم کوردستان رەسنێد.
دووپات کرد ک وە ئیرادەی سیاسی هاوبەش و چەودیاریکردن بەرژەوەنی گشتی توەنیمن ئەوە بکەیمنە دەرفەتیگ ئەرا قایمکردن بڕوایی ناوبەین خوەمان و دووارە رێککردن ماڵمان وەشیوەیگ خاستر، و ئارامگردن ژاوەژاو وەخاتر قایمکردن هاز عراق و هەرێم کوردستان.
ئەنجومەن نوینەرەیل عراق، شەفەق رووژ دووشەممە، دەنگ لەبان یاسای بودجەی فیدڕاڵی ئەرا ساڵەیل ٢٠٢٣، ٢٠٢٤، ٢٠٢٥، دا، دویای دانوسەنینیگ تا پەنج رووژ وەردەوام بوی.
