سەرۆک هەرێم کوردستان پیرووزبایی لە زەهاوی برادەری کەێد ک بویە وەزیریگ لە بەریتانیا
شەفەق نیوز/ نێچیروان بارزانی سەرۆک هەرێم کوردستان، ئمڕوو چوارشەممە، پیرووزبایی لە نازم زەهاوی کرد وەبوونەی ئەوە ک بویە وەزیر دارایی لە حکومەت بەریتانیا.
نێچیروان بارزانی لەبان سۆشیال میدیا نویسان: گەرمترین پیرووزبایی لە زەهاوی برادەرم کەم، وەبوونەی داناینی وەزیر دارایی لە حکومەت شاهنشین یەکگرتگ.
وتیش: ئومید گشت سەرکەفتنیگ لە پۆستە نووگەی ئەرای خوازم.
بەریتانیا داناین نازم زەهاوی ئەرا وەزیر دارایی راگەیان، ئەوەیش دویای دەسکیشانەوەی وەزیرەیل دارایی و تەندروسی بەریتانیا لەشوینیەک لە جویلەیگ ک بانان بۆریس جۆنسۆن سەرۆک وەزیرەیل بەریتانیا خەێدە مەترسی، دویای زنجیرەی رسواییگ ک زەرەد وە ئیدارەگەی دا.
زەهاوی ک ئیسە وەزیر خوەنەواریە، دەسخوەشی لەلی کریا و وە وەزیر واکسین ناوی هاوریا، هەنای بەریتانیا یەکیگ لە زویترین دەوڵەتەیل جەهان بوی لە دەسکردن وە بەرنامەی واکسین ئەرا مقەیەتیکردن لە کۆڤید-١٩.
زەهاوی جویر پەنابەریگ بویە لە بنچینەی کورد عراق، هەنای مناڵ بویە رەسیەسە بەریتانیا، و جیواز بوی لەو رکابەرەیلی.
زەهاوی لە دامەزرانن کۆمپانیای یۆجۆف ئەرا رەوانگەی را بەشدار بوی، وەرجەیە ک لە ساڵ ٢٠١٠ بچوودە پەرلەمان، ولە هەفتەی گوزەشتە وت: رووژیگ لە رووژان شەرەف ئەوە هەڵگرم ک بوومە سەرۆک وەزیرەیل.
