سەرۆک هەرێم کوردستان باس بڕیگ باوەت کەێد وەگەرد باڵیۆز نوو رۆمانیا
شەفەق نیوز/ نێچیروان بارزانی سەرۆک هەرێم کوردستان، ئمڕوو دووشەممە، وەگەرد رادۆ دوبری باڵیۆز نوو ڕۆمانیا لە عراق، باس بڕیگ باوەت کرد.
سەرۆکایەتی هەرێم کوردستان لە بەیاننامیگ رەسیە ئاژانس شەفەق نیوز وت: سەرۆک نێچیروان بارزانی، گشت پاڵپشتی و هاوکارییگ ئەرا سەرکەفتن ئەرکەیل باڵیۆز ڕۆمانیا نشان دا، ودووارە سوپاس ورێز هەرێم کوردستان ئەرا ئەو پاڵپشتی وهاوکاریەیلە کرد ک رۆمانیا ئەرا عراق و هەرێم کوردستان پێشکەشی کردیە، جویر ئەندامیگ لە هاوپەیمان ناودەڵەتی ئەرا لەناوبردن داعش.
لەلای خوەییش، باڵیۆز رۆمانیا باس ئارەزوو وڵاتەگەی کرد لە قایمکردن پەیوەندیەیل وەرد عراق و هەرێم کوردستان و فراوانکردن ئاسوەیل هاوکاری هاوبەش، تایبەت لە چینەیل ئابووری و بازرگانی ووزە و کشتوکاڵی وبانکی و روشنهۊری و خوەنەواری زانکۆ.
هەردوگ لایەنەگە باس دەرفەتەیل بەرهەمهاوردن وکار کۆمپانیایل رۆمانیا لە عراق و هەرێم کوردستان کردن، و باڵیۆز رۆمانیا باس ئارەزوو وڵاتەگەی ئەرا وەکارخستن دەسەی باڵای ئابووری و بازرگانی هاوبەش ناوبەین رۆمانیا و عراق کرد، و بەشداریکردن هەرێم کوردستان وەگرنگ نووڕی تا لە دەرفەتەیل وچینەیلی سوود بگرێد.
رەوش سیاسی عراق، پەیوەندیەیل هەولێر-بەغداد، باوەت ئاوارە و پەنابەرەیل لە رۆمانیا و هەرێم کوردستان، رەوشەیل ناوچەگە وەشیوەی گشتی، گەشەیل جەنگ ئۆکرانیا، باوەتەیلیگ بوین لەو دیدارە ک وەرپرس نویسینگەی باڵیۆزخانەی رۆمانیا لە هەولێر ئامادەی بوی.
