سەرکردەیل کوردستان وەگەرد شاندیگ لە شەپۆل سەدری گردەو بوون
شەفەق نیوز/ نێچیروان بارزانی جیگر سەرۆک پارت دیموکرات کوردستان، ئمڕوو سێشەممە، لە هەولێر چەوەی کەفتە شاندیگ لە شەپۆل سەدر وە سەرپەرشتی نەسار روبەیعی سەرۆک دەزگای سیاسی لە شەپۆلەگە.
سەرۆکایەتی هەرێم لە بەیاننامەیگ وت: لە چەوپێکەفتنیگ ئەندامەیل نووسینگەی سیاسی پارت دیموکردات کوردستان ئامادەی بوین، باس لە دویاترین نووەوبیەیل رەوشەیل عراق وەشیوەی گشتی کریا، باوەت سیاسی، هەڵبژاردن هاتگ، پێشبینی نەقشەی سیاسی دوویارووژ وڵاتەگە، پەیوەندیەیل هەولێر – بەغداد، و بڕیگ باوەت ک لەلای هەردوگلا گرنگە.
بەیاننامەگە وتیش: رایەیل هەردوگلاگە رێککەفتن ک باوەتە سیاسیەگە لە عراق و دویای رەدبوین هەیژدە ساڵ لە رزگارکردنەگە، چگە ناو قۆناغ و رەوشەیل نوویگ، وبایەتە فرەی خوازینەی ئی قۆناغە و خوزینەیل گەل عراق و پێکهاتەیلی وەجی بارێد، وئەرا وەدەسهاوردن دویارووژیگ خاستر بایەتە گشتی لە هەڵەی و کەموکوڵی گوزەیشتە سوود بگرن، ئەراوە بایەتە لایەن و پێکهاتەیل بڕەسنە رەسینەوەی هاوبەشیگ و کار وەیەکەو بکەن ئەرا بتەوکردن هاوبەشیەیل ودامەزراوەیل دوەوڵەتەگە ودابینکردن ئارامی وئاسایش وخوەشگوزرانی هاووڵاتیەییل.
شاندە میوانەگە خوەشهاڵی خوەی وە سەردانی ئەرا هەولێر و چەوپیکەفتن وکۆبونەوەیل ناوی نشان دا، و باس لە ئومیدی کرد ک لایەنەیل وپێکهاتەیل عراق لەناو هابەشی و هاوکاری لەناونی خوەیان وەرەو ئیسە و ئایندەیگ خاستر ئەرا وڵاتەگە لە گشت چینەیل روی بکەن.
لە خود چینەگە، مەسعود بارزانی سەرکردەی کورد، چەوی کەفتە خود شاندەگە و لە چەوپیکەفتنەگە باس لە رەوشەیل سیاسی و سەختیەیل نوای کار سیاسی لە عراق کریا، وپەیوەندیەیل ناوبەین هەولێر و بەغداد، وهەمیش رووشنایی خریا بان هەڵبژاردن هاتگ، و خوازینەیل جادەی عراقی ئەرا قۆناغ ئایندە.
