سەرکردەیل کوردستان پیرۆزبایی کاکەییەکان وە جەژن قولتاس کەن
شەفەق نیوز/ وەرپرسەیلیگ لە هەرێم کوردستان، ئمڕوو دووشەممە، پیروزبایی لە کاکەییەکان وە جەژن "قولتاس" چەژن سێ شەوەگە کردن.
مەسعود بارزانی سەرۆک پارتی دیموکراتی کوردستان، لە بەیاننامەیگ وت: وە بونەی گلەوخواردن جەژن قولتاس، پیروزبایی ئەرا برا و خوەشکەیل کاکەیی لە کوردستان و لەهەر شۊنیگ لە جەهان پێشکەش کەم، و ئومید خوازم ئاهەنگ جەژنیان وە خوەشی بکەن، و ئی جەژنە بوودە سەرچەوەیگ ئەرا زیاتر لە کار مرۆیی، و ئومید خوازم گشت پیکاتەیل گەلەیل کوردستان پڕ لە دووسی و ئاشتی بوون.
لەلای خوەییش نێچیروان بارزانی سەرۆک هەرێم کوردستان لە بەیاننامەیگ وت: وەبونەی جەژن قولتاس، گەرمترین پیرۆزبایی ئەرا گشت خوەشک وبرایل کاکەیی لە کوردستان و عراق و دەیشت وڵاتەگە پێشکەش کەم، و ئومید جەژنیگ خوەش وئارام ئەرایان خوازم، و ئی جەژنە بوودە مایەی خەیر و خوەشی.
وتیش: لەی جەژنە دووارە دووپات لە مقەیەتیکردن ماف خوەشک و برا کاکەییە ئەزیزەیل و گشت پێکاتەیل کەیمن، و هەمیش لە مەنین کوردستان جۊر خاکیگ ئەرا وەیەکەوژیان و پشتگردن و خوەشبۊین و فراوانی و یەک قەبوڵی.
لەلای خوەییش، مەسرور بارزانی سەرۆک حکومەت هەرێم کوردستان وت: وەگەرد هاتن جەژن قولتاس، گەرمترین پیرۆزبایی ئەرا گشت خوەشک و برایل کاکەیی و گشت یارسانیەیل کوردستان و جەهان پێشکەش کەم، و لە خودای میهرەبان داوا کەم رووژی و پەرستگاریدان قەبووڵ بکەێد، و رووژەیل جەژن وە ئارامی و خوەشی بوەێنە سەر.
یارسانی، یا کاکەیی، یەکیگە لە پەلەیل ئایەن یەزدانی کۆنە، ک وەرجە فراوانبۊین ئیسلامی ئاین فرەی کورد بۊێە، وئیسە بوودە سێ بەش: یەزیدی، و یارسانی، و عەلەویەکان تورکیا.
یارسانیەیلە هانە ناوچەیل کورد لە ئیران و فرەگەی لە کرمانشاە، وەگەرد دەیان پارێزگای تر،.وهەمیش هانە شارەیل هەرێم کوردستان و هاماری نەینەوا، تا رەسێدە مەنەلی وخانقين و کەرکوک.
