سەرۆکایەتی هەرێم کوردستان خوازینەیل سەربازی دەێدە سەنگەرەیل پیشمەرگە
شەفەق نیوز/ لە سەرۆکایەتی هەرێم کوردستان، شەوەکی ئمڕوو سێشەممە، رسوومەیل وەدەسداین بەشیگتر لە خوازینەیل سەنگەرەیل پیشمەرگە وەڕیەو چگ ک لەلایەن سەرۆکایەتی دابین کریا، و نوینەرەیل وەزارەت پیشمەرگە وەریان گردن.
لەو رسوومەیلە هەرلە لیوا ئیسکەندەر حاجی ساڵح وەرپرس فەرمانگەی کاروبار سەربازی لە سەرۆکایەتی هەرێم کوردستان، و لیوا روکن هۆشمەند حەیدەر، و لێوا روکن نەجمەدین عومەر نوینەرەیل لە وەزارەت پیشمەرگە بەشداری کردن.
وەگورەی بەیاننامەی سەرۆکایەتی هەرێم کوردستان، هەردوگ لایەنەگە دووپات کردن ک پاڵپشتیکردن سەرۆک هەرێم کوردستان، و دابینکردن خوازینەیل، و قایمکردن سەنگەرەیل پیشمەرگە کاریگەری وەرچەویگ لە مقەیەتیکردن گیان پیشمەرگە و تاواناداریان لە وەرگری داشت.
ئی کارە لە کوتایی ساڵ ٢٠٢١ وە فەرمان و پاڵپشتی نێچیروان بارزانی سەرۆک هەرێم کوردستان و فەرماندەی گشتی هیزەیل پیشمەرگە وە دابینکردن خوازینەیل وئامێرەیل وەرگری دەسوەپی کرد.
ئەو ئۆپەراسیۆنە دروسکردن خەندەق و دامەزرانن سەنگەر و خوەی مقەیەتیکردن وەبی جیاوازی گرێدەو، وەگورەی خوازینەیل، ک خریەنە خزمەت گشت کەرت و سەنگەرەیل پیشمەرگە.
