سڵاکار سەرۆکایەتی هەرێم پەیامەیل نێچیروان بارزانی لە سەردانەیلی ئەرا بەغدا ئاشکرا کەێد
هەگ ئەرا هەولێر گلەو خوارد، دویای چەن رووژیگ دووارە وەرەو بەغدای پایتەخت کەفتە ری، لەورا وەگە٣ سەرۆکەیل ئەنجومەن باڵای دادوەری و دادگای باڵای فیدراڵی گردەو بوی، دویای ئەوە گردەوبوینیگ وەرد سەرۆک حکومەت فیدراڵی، محمد شیاع سودانی ئەنجام دا.
وەگەرد ئەوە کە بارزانی لە پایتەختید فیدراڵی بوی، ئیوارەی دویەکە سێشەممە، شاندیگ کورد ەە سەرۆکایەتی وەزیر دارایی و ئابووری حکومەت هەرێم کوردستان رەسیە بەغدا ئەرا تاوتوێکردن هەموارکردن یاسای بودجە، وەتایبەتی ئەوانەگ پەیوەندی ەە بەش هەرێمەو دیرن.
ئەوانەگ پەیوەندیدارن نووڕن کە سەردانە دووارەیل بارزانی ئەرا بەغدا هەڵگرید چەن پەیام و نشانەس، دیارترینیان لەیەکنزیکبوین دیدگایلە ئەرا وازکردن گریەی ئەو پرسەیلە کە ساڵانیگە لەناوەین بەغدا و هەولێر وەبی چارەسەر گیر هاتنە، و زوورکردنە لەبان مافە دەستوری و یاساییەیل هەرێم.
لەی باوەتە خەیری یوزانی، سڵاکار سەرۆکایەتی هەرێم کوردستان، ئەرا ئاژانس شەفەق نیوز وت: توەنیمن بویشیمن ئی سەردانە و سەردانەیل وەرین سەرۆک هەرێم کوردستان ئەرا بەغدا بەشداربویە لە وازکردن کەناڵەیل دانوسەنین و پەیوەندی ناوەین هەولێر و بەغدا، دویای وەختیگ لە گرژی و پەرەسەنین”.
وتیش: " لە سەردانەیلی بڕیگ باوەت گرنگ گیرهاتگ ناوەین هەردوگلا تاوتوێ کریان، جویر باوەت دارایی و رەوش هەرێم کوردستان و باوەتە هاوبەشەیل ترەک".
هەمیش وت"وە گشتی سەردانیگ ئەرێنین و جی گەشبینیین ئەرا بانان پەیوەندییەیل پەیوەندییەیل ناوەین هەردوگلا، بەڵام ئەو باوەتە وەدویاچگن خوازێد لەلایەن هەردوگلاوە تا ئەنجامەیلیان بکەنە راسی و پیشکەفتن لە چارەسەرکردن وەدەس بارن."
یوزانی دووپات کرد کە "سەردان و گفتوگۆیل رووشنایی خەنە بان گفتوگۆ وەرد حکومەت عراق ئەرا چارەسەرکردن کێشە گیرهاتگەیل وەتایبەتی کێشە داراییەیل، جویر مووچەی فەرمانبەرەیل هەرێم کوردستان. هەمیش سەرۆک هەرێم تەقەلا دەێد مافە دەستوورییەیل هەرێم کوردستان دووپات بکەێدەو، لەوانەیش ماف چارەی خوەینویسین و وەڕێوەبردن سەرچەوە سروشتییەیل”.
ئاشکرا کەێد کە ئامانج سەردانەیل ئەرا قایمکردن هاوکارییە ئابوورییەیل وەگەرد حکومەت عراق و کیشیان بەرهەمهاوردن وەرەو هەرێم کوردستان. هەمیش سەرۆک هەرێم رووشنایی خەێدە بان گرنگی پەیاکردن چارەسەری هاوبەش ئەرا ئەو پرسەیلە کە پەیوەندی وە گەرد کوردستان و عراقەو دیرن جویر ئاسایش و نواگیریکردن تیرۆر.
لەباوەت ئەو پەیامەیلە کە سەرۆک هەرێم خوازێد لە ری ئەو سەردانەیلە بڕەسنێد، سڵاکار سەرۆکایەتی هەرێم ئویشێد: “لە نووڕینم سەرۆک هەرێم خوازێد پەیامیگ کل بکەێد کە هەرێم کوردستان هاوبەشیک جەوهەری حکومەت عراقە، و ئەو هاوکارییە لە ناویان پەیاکردن سەقامگیری و خوەشگوزەرانی لە عراق وە گشتی خوازێد، وەتایبەتی کە لە هەر جاریگ زوور لەبان پابەندبوین هەرێم وە یاسا و دەستوور عراق کردگە، و خوازێد وە بەغدا بویشێد سەقامگیر و بیوەیی هەرێم ئەرا بەرهەمهاوردن و ئەرا گەشەپیدان و خۆشگوزەرانی ئەرا گەلەگەی.
لای خوەییش توێژەر کاروبار سیاسی یاسین عەزیز، لە قسەیلی بۆ ئاژانس شەفەق نیوز وت: “یە سەرەتای قۆناغیگ نووە و بڕیاریگ هەس لەلایەن سەرکردایەتی کورد و سەرۆک هەرێم ئەرا ئامادەبوین وەردەوام لە بەغدا، جویر ئەوەگ مانگ گوزەشتە دوو سەردان بوی و ئی سەردانە گرنگە "وەتایبەت دویای سەردانە سەرکەفتیەگەی ئەرا ئیران".
وتیش: " لە نووڕینم سەردانەیل دووارەی سەرۆک هەرێم ئەرا بەغدا و دیدارەیلی چ حزبی، سیاسی، یا حکومی، وەرد وەرپرسەیل پاڵنەریگ خاس و کاڵ قایمیگ دەێد ئەرا چارەسەرکردن کێشە گیرهاتگەیل ناوەین هەولێر و بەغدا". "
لەباوت رێککەفتنەیل ناوەین هەردوگلا، عەزیز ئویشێد: “رێککەفتن سیاسی و ئیداری دیرێد، چ لەناوەین لایەنەیل بوود یا حکومەت، ئەراوە من دوینم کە جیوەجیکردن ڕێککەفتن و پەیمانەیل وەرین بەس بوود ئەرا چارەسەرکردن کێشەیل و لە راسی رێککەفتنیگ وەردەوام بوود ئەرا چارەسەرکردن و لابدوردن گشت و ئەو قەیرانەیلە کە لەناوەین هەولێر و بەغدادا بوین ".
وتیش "مەیلیگ تایبەت لەلای سەرۆک هەرێم هەس، و گووش لەلی تەکانیمن چەن جاریگ وتیاد هەرێم دەسکردیە وە چگن ئەرا قویلایی لە بەغدایە و چارەسەرەیل بایەسە لای بەغدا و لەناوی بوود، و وەردەوامی سەرۆک هەرێم لە بەغدا ئەو بڕوا نشان دەێد کە سەرکردایەتی کورد و کەسایەتی سەرۆک هەرێم نیاز دیرێد وەگورجی ئامادە بوود، و ئەرا لاوردن هەر بەدفامستن یا قەیرانیگ کە پەیوەندی ناوەین هەولێر و بەغدا وەو رەوشە رەد بوود”.
نێچیروان بارزانی، سەرۆک هەرێم کوردستان، لە 27 نیسان، سەردان بەغدا کرد و وەگەرد محمد شیاع سودانی، سەرۆک وەزیرەیل فیدراڵی گردەو بوی.
هەمیش بەشداری هەردوگ گردەوبوین چوارچیوەی هەماهەنگیی لایەنە شیعەیل کرد، و لە گردەوبوین ئاسایی هاوپەیمان ئیدارەی دەوڵەت، کە تا دیر وەخت شەو وەردەوام بوی، بارزانی دووپاتیش لە خواست جددی هەرێم کرد ئەرا چارەسەرکردن ناکۆکی و کێشە گیرهاتگەیل وەرد حکوومەتی فیدراڵی وەگورەی بڕگەیل دەستوور هەمیشەیی وڵات.
بارزانی لە هەولێر پایتەخت هەرێم کوردستانەوە، لە پەنجەمین سەردانی لە ماوەی 11 ساڵ، لە 5 ئایار وەرەو تاران پایتەختی ئیران کەفتە ری، و لەورا وەگەرد عەلی خامنەیی، ڕێبەر باڵای ئیران، و ئیبراهیم ڕەئیسی، سەرۆککۆمار ئیران و سیاسییە باڵایل ئیران و سەرکردەیل گردەو بوی، تا ئیجا بارزانی دویەکە سێشەممە جاریگ ترەک سەردان بەغدای پایتەخت کرد.
