زەخمداری پۆلیسیگ وەگولەی راوچیەیل لە سلێمانی

شەفەق نیوز/ وەڕێەوبەرایەتی پۆلیس دارسان و ژینگە لە پارێزگای سلێمانی، ئمڕوو جومعە، خەوەردا یەکیگ لە کارمەندەیلیان تویش زەخمداری بویە وەخت رویوروی بوینیگ چەکداری وەگەرد راوچیەیل لە قەزای دەربەندیخان.

وەڕێەوبەرایەتیەگە ئمڕوو لە بەیاننامەیگ وت، وە خاتر قەیەغەکردن راوکردن و دەسگیرکردن راوچیەیل مەفرەزەیگ لە بەش پۆلیس دارسان دەربەندیخان رویکردنە کویەی"زمناکۆ" باوجی وە داخەو وە لایەن راوچیەیل رویوەروی تەقەکردن بوینە لە ئەنجام یەکیگ لە کارمەندەیل زەخمداربویە وە گولەی راوچیەیل.

لە بەیاننامەگە دیاریکرد لەوەر نارێکی ناوچەگە راوچیەیل توەنستنە خوەیان بشارنەو لەهەمان وەخت مەفرەزەیگ لە پۆلیس دارسان و دەسڵاتدارەیل ئەمنی دیاریکریاگ لە ناوچەگە بڵاوکریانە ئەرا پەیاکردن راوچیەیل و داسگیرکردنیان.