پەروەردەی گەرمیان خوەی لەژیر وەرپرسایەتی ئەو مەکتەوەیلە دەرکەێد ک نزیکە بڕمێەن
![پەروەردەی گەرمیان خوەی لەژیر وەرپرسایەتی ئەو مەکتەوەیلە دەرکەێد ک نزیکە بڕمێەن](https://media.shafaq.com/media/arcella/1668246836895.jpeg)
شەفەق نیوز/ وەڕێەوبەرایەتی پەروەردەی ئیدارەی گەرمیان، ئمڕوو شەممە هوشداری دا ک چەن مەکتەویگ کۆنە هەس هانە هەڕەشەی رمیان و یە ماوەی درویژیگە خاسەو نەکریانە، لە خود وەختەگە باس کەمی شمارەی بینایل مەکتەوەیل کرد.
دارا حەسەن وەڕیەوبەر گشتی پەروەردەی ئیدارەی گەرمیان لە بەیاننامەیگ رەسیە ئاژانس شەفەق نیوز وت: گرفتە گەورەیە ک بایەتە چارەی بکریەێد ئەوەسە ک مەکتەوەل کەمن لەوەختیگ شمارەی خوەنەوارەیل ساڵ دویای ساڵ زیایەو بوود، و دووپات کرد ک توەنستیمن بەجەر گرفتەیل بکەیمن، و هەس کەیمن پیش کەفتیمنە، باوجی ئەوە نیە ک ئەوەسا مەکتەوەیل نوویگ بینا کریەن.
وەڕیەوبەر گشتی پەروەردەی ئیدارەی گەرمیان وتیش: نۆ مەکتەو لەناو ئیدارەگە نزیکە بڕمیەن، و کتاویگ ئەرا وەزارەت پەروەردە و فێرکردن و دارایی کلکردمە تا دەسبکەنە خاسەوکردنیان.
وتیش: رەزامەنی وەزارەت دارایی و ئابوری و ئەنجومەن وەزیرەیل هەرێم کوردستان ئەرا دەسکردن وە خاسەوکردن ٧٠ مەکتەو وە زویترین وەخت وەرگریا، و ئەوەسا ٨ مەکتەو لەبان بووجەی ئەوزەڵکردن پارێزگایل خاسەو کریەن.
دیاری کرد ک مەکتەو سەرەتایی لە ئاوای زەماوەنگەی ک نزیکە بڕمیەێد رەزامەنی ئەرا خاسەوکردنی هات، باوجی هەڵە لەناو بەڵگەیل هەس ک لەجیای تەرخانکردن ٧٠ مەلیۆن، ٥٠ مەلیۆن کلکریایە، و ئیسە تەقەلای چارەکردن گیچەڵەگە دەیمن، و دیاری کرد ک ١٣ مەکتەو لە ئیدارەی گەرمیان هەس سێ دەوام هاناویان، و ئەگەر لە ساڵەیل بانان ئیجویرە وەردەوام بوود، ئەوسا گیچەڵیگ گەورەتر ئەرامان پەیا کەێد.
٤٠٥ مەکتەو ناوەندی و سەرەتایی لە ئیدارەی گەرمیان هەس، و لەوەر قەیران دارایی کار لە سێ پڕۆژە وسیا.