کەرنەڤاڵ ساڵ نوو لە خانەقین.. وینە
2022-12-28T07:58:57+00:00
شەفەق نیوز/ لە هۆڵ لاوان لە شار خانەقین، ئمڕوو چوارشەممە، وە چەودیاریکردن ئەحمەد زەرگووش جینشین قایمقام خانەقین، وە سەرپەرشتیاری وەڕیەوبەرایەتی رووشنهویری و هونەر/کوردستان لە خانەقین، و ناوەند گەنج و وەرزش خانەقین،کەرنەڤاڵیگ هونەری وە بوونەی سەر ساڵ نوو وەڕیەو چگ.
کەرنەڤاڵەگە وە وازکردن پیشانگایگ شیوەکاری و فوتۆگراڤی ئەرا هونەرمەنەیلیگ لە خانەقین و جەلەولا دەسوەپی کریا، ئیجا سروود و گورانی مناڵەیل وە دڵنگ پاپا نۆێل وە خوەشی سەر ساڵ نوو، و چەن پارچە گورانییگ ئەرا هونەرمەن خانەقینی سەی حەیدەر سەی فوئاد پیشکەش کریا.
کەرنەڤاڵەگە وە ئامادەبوون شمارەی فرەیگ لە رووشنهویر و ئەدیب و هونەرمەن و کەسایەتیەیل شار خانەقین و جەلەولا و سەعدیە وەڕیەو چگ.
کەرنەڤاڵ سەر ساڵ نوو لە خانەقین، بەشەوکردن خەڵات ئەرا چەن هونەرمەنیگ بەشدار لە کەرنەڤاڵەگە وەخوەی دی.
