پەرلەمان کوردستان پەیامیگ دەربارەی تەعریبکردن ناوچەیلیگ لە کەرکوک ئاڕاستە کەێدە هەولێر و بەغداد
شەفەق نیوز/ دەسەی ناوچە کوردستانیە دابڕیایەگان لە پەرلەمان هەرێم کوردستان، ئمڕوو سێشممە، داوا لە حکومەت هەرێم کرد وەکوتپڕ وەرەو حکومەت بەغداد جوولە بکەێد ئەرا وسانن هەڵمەتەیل تەعریبکردنەگان لە ناوچەیلیگ لە پارێزگای کەرکوک.
خانمە پەرلەمانتار جوان یونس وەرپرس دەسەگە لە کۆنگرەیگ رۆژنامەوانی وەگەر بڕیگ لە نۆێنەرەیل ناوچەی سرکران و پەڵکانە لە کشاورزەگان وت: دانیشتوە کوردەگان داوای مقەیەتی دارایی و پویل و زەویەیل کشتوکاڵییان کەن، و ئیمەیش لە دەسەگە پەیامیگ ئەرا حکومەت هەرێم ئاڕاستە کەیمن وە وەردەوامی گفتوگۆەیل وەگەرد حکومەت فیدڕاڵی تا پەلامارەگان و تەعریبکردنەگان ک رەسنە هاووڵاتییەیلمان لە پەڵکانە بووسنن.
وتیش؛ پێشنیار کەیمن وە زویترین وەخت رێککەفتنیگ ئەمنی لە باوەت ناوچە دابڕیایەگان بکریەێد.
لەلای خوەییش محمد ئەمین وەرپرس دەسەی وەرگریکردن لە مافەیل کشاورزەگان لەناوچەی سرکران ک بەشیگە لە ناحیەی پەڵکانە لە ناو کۆنگرەگە وت: سەردان پەرلەمان هەرێم کوردستان کردیمن و دەسەی ناوچە دابڕیایەگان میوانمان کردن و داواکاریەیلمان دایمنە دەسیان، و و مکیسمان کردن ئەرا دەسمیەتیمان لە وەرگریکردن لە مافەیلمان وەرانوەر ئی پەلامار نا سرووشتیە و هەڵمەتەیل تەعریبکردن ک لەلایەن دامەزراوەیلیگ لە حکومەت کەفیمنە وەریان.
وتیش؛ لایەنەیلیگ تەقەلای چووڵکردن ناوچەیل سرکران و پەڵکانە لە دانیشتوە کورد رەسنەگان دەن، و عەرەوە هاتگەگان لە شووینیان جیگر بوون، و تا ئیسە کوردەگان لە ناوچەیل خۆڕاگری کردنە، وەلی لە خود وەختەگە پشتگیری پەرلەمان و حکومەت هەرێم خوازن تا بڕەسێدە چارەسەری تەواوەتییگ وە گەرد حکومەت فیدڕاڵی ئەرا چارەسەرکەردن ئی گرفتەیلە وەگورەی مادەی ١٤٠ لە دەستوور هەمیشەیی عراق.
